កិច្ចប្រជុំសាមញ្ញក្រុមប្រឹក្សា ខេត្តកណ្ដាល លើកទី១៤ អាណត្តិទី៣
ខេត្តកណ្ដាល៖ឯកឧត្តមបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្តាល កាលពីព្រឹកថ្ងៃទី១៤ ខែកក្កដា ឆ្នាំ២០២១ បានដឹកនាំកិច្ចប្រជុំសាមញ្ញលើកទី១៤ អាណត្តិទី៣ របស់ក្រុមប្រឹក្សាខេត្ត ដោយមានការអញ្ជើញចូលរួមពី ឯកឧត្តម គង់ សោភ័ណ្ឌ អភិបាល នៃគណៈអភិបាល ខេត្តកណ្ដាល ព្រមទាំងឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត និងមន្ទីរអង្គភាពនានាជុំវិញខេត្តជាច្រើនរូប។
នាឱកាសនោះឯកឧត្តមបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្តាល បានស្នើឲ្យរដ្ឋបាលខេត្ត និងអង្គភាពពាក់ព័ន្ធ ត្រូវត្រៀមរៀបចំផែនការថវិកាឆ្នាំ២០២១ ឲ្យបានច្បាស់លាស់ តាមការណែនាំរបស់ក្រសួងសេដ្ឋកិច្ច និងហិរញ្ញវត្ថុ សម្រាប់ត្រៀមឲ្យក្រុមប្រឹក្សាខេត្ត ធ្វើការពិនិត្យ ពិភាក្សា និងអនុម័ត ដើម្បីធ្វើឲ្យរដ្ឋបាលខេត្ត មានលទ្ធភាពគ្រប់គ្រាន់ ក្នុងការអភិវឌ្ឍខេត្តតាមផែនការដែលបានគ្រោងទុក និងអាចដោះស្រាយបញ្ហាប្រឈមនានារបស់ប្រជាពលរដ្ឋបានប្រកបដោយប្រសិទ្ធិភាព។
ឯកឧត្តមបានបញ្ជាក់ថា ការរៀបចំកសាងផែនការថវិកាសម្រាប់ឆ្នាំ២០២១ខាងមុខនេះ គឺជាការងារចាំបាច់ណាស់ ត្រូវធ្វើឲ្យបានស្របទៅតាម តម្រូវការ ជាអាទិភាពរបស់ប្រជាពលរដ្ឋ និងតាមសំណូមពររបស់ប្រជាពលរដ្ឋ ដែលបានស្នើសុំនៅក្នុងវេទិការបស់ក្រុមប្រឹក្សាទាំងថ្នាក់ស្រុក និងថ្នាក់ខេត្ត។
ក្នុងកិច្ចប្រជុំនេះ ឯកឧត្តមប្រធានក្រុមប្រឹក្សាខេត្ត បានធ្វើការបានក្រើនរំលឹកដល់ ប្រធានមន្ទីរ អង្គភាពទាំងអស់ ឲ្យយកចិត្តទុកដាក់រាល់កិច្ចប្រជុំប្រចាំខែ របស់គណៈអភិបាលខេត្ត និងកិច្ចប្រជុំរបស់ក្រុមប្រឹក្សាខេត្ត ហាមមិនឲ្យអវត្តមានជាដាច់ខាត ប្រធានឬអនុប្រធានមន្ទីរទាំងឡាយត្រូវក្តាប់ការងារឲ្យបានច្បាស់លាស់ ដើម្បីត្រួតពិនិត្យ វាយតម្លៃ និងឆ្លុះបញ្ចាំងអំពីសមិទ្ធផលការងារ និងបញ្ហាប្រឈមនានា ហើយអាចដោះស្រាយបញ្ហានានាទាំងនោះបាន ជៀសវាងឱ្យអនុប្រធាន ឬមន្ត្រីចូលរួមប្រជុំជំនួស ហើយក្តាប់ការងារអត់បាន ដែលធ្វើឱ្យពិបាកក្នុងការដោះស្រាយ។
ឯកឧត្តម គង់ សោភ័ណ្ឌ អភិបាល នៃគណៈអភិបាល ខេត្តកណ្ដាល បានណែនាំ និងជម្រុញបន្ថែមដល់រដ្ឋបាលខេត្ត មន្ទីរអង្គភាព និងអាជ្ញាធរក្រុង-ស្រុក រួមទាំងសមត្ថកិច្ចទាំង អស់ ត្រូវខិតខំយកចិត្តទុកដាក់អនុវត្តការងាររបស់ខ្លួនបន្ថែមទៀត ជាពិសេស លើការងារផ្តល់សេវាសាធារណៈឱ្យមានប្រសិទ្ធភាព ងាយស្រួល ឆាប់រហ័ស មានតម្លាភាព ត្រូវខិតខំពង្រឹងគោលនយោបាយភូមិ-ឃុំមានសុវត្ថិភាពទាំង៩ ចំណុច ដោយមានទំនួលខុសត្រូវខ្ពស់ លើការបំពេញភារកិច្ចរបស់ខ្លួនឲ្យបានខ្ជាប់ខ្ជួន ដើម្បីភាពសុខសាន្ត និងការរីកចម្រើនរបស់ប្រជាពលរដ្ឋក្នុងខេត្តកណ្ដាល៕
