កិច្ចប្រជុំផ្សព្វផ្សាយសារាចរណែនាំ របស់ក្រសួងសេដ្ឋកិច្ច និងហិរញ្ញវត្ថុ ស្តីពីនីតិវិធីបច្ចេកទេស នៃការរៀបចំគម្រោងថវិការបស់រដ្ឋបាលថ្នាក់ក្រោមជាតិ សម្រាប់ការគ្រប់គ្រងឆ្នាំ២០២១
ខេត្តស្ទឹងត្រែង៖សារាចរណែនាំលេខ០០៥ របស់ក្រសួងសេដ្ឋកិច្ច និងហិរញ្ញវត្ថុគឺពិតជាមានសារៈសំខាន់ សម្រាប់ឲ្យមន្រ្តីជំនាញថ្នាក់ក្រោមជាតិ បានយល់ដឹងពីការរៀបចំផែនការថវិកា និងការគ្រប់គ្រងហិរញ្ញវត្ថុឲ្យបានត្រឹមត្រូវច្បាស់លាស់។
ឯកឧត្តម ម៉ុម សារឿន អភិបាល នៃគណៈអភិបាលខេត្តស្ទឹងត្រែងមានប្រសាសន៍បែបនេះ ក្នុងឱកាសដែលឯកឧត្តមអញ្ជើញជាអធិបតី ក្នុងកិច្ចប្រជុំផ្សព្វផ្សាយសារាចរណែនាំ លេខ០០៥សហវ ចុះថ្ងៃទី២៥ ខែមិថុនា ឆ្នាំ២០២០ របស់ក្រសួងសេដ្ឋកិច្ច និងហិរញ្ញវត្ថុ ស្តីពីនីតិវិធីបច្ចេកទេស នៃការរៀបចំគម្រោងថវិការបស់រដ្ឋបាលថ្នាក់ក្រោមជាតិ សម្រាប់ការគ្រប់គ្រងឆ្នាំ២០២១ កាលពីរសៀលថ្ងៃអង្គារ ៩រោច ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែកក្កដា ឆ្នាំ២០២០ នៅសាលប្រជុំសាលាខេត្ត។
កិច្ចប្រជុំនេះក៏មានការអញ្ជើញចូលរួមពី សមាជិកក្រុមប្រឹក្សាខេត្ត គណៈអភិបាលខេត្ត តំណាងក្រសួងសេដ្ឋកិច្ចនិងហិរញ្ញវត្ថុ ប្រធាន អនុប្រធានមន្ទីរ អង្គភាពជុំវិញខេត្ត ថ្នាក់ដឹកនាំក្រុង ស្រុក ក្រុមប្រឹក្សា ឃុំ សង្កាត់ មេឃុំ ចៅសង្កាត់ ស្មៀនឃុំ សង្កាត់ និងមន្រ្តីជំនាញពាក់ព័ន្ធសរុប១០៨រូបផងដែរ។
ជាមួយគ្នានោះដែរឯកឧត្តម ម៉ុម អភិបាលខេត្តបានមានប្រសាសន៍ថា៖ការរៀបចំគម្រោងថវិការឆ្នាំ២០២១ គឺជាដំណើរឈានឆ្ពោះទៅរករបត់ថ្មី នៃការងារគ្រប់គ្រងថវិករស្របតាម យុទ្ធសាស្ត្រនៃការកំណែទំរង់ប្រព័ន្ធថវិការរដ្ឋបាលថ្នាក់ក្រោមជាតិ ដែលបានប្រកាសឲ្យអនុវត្តកាលពីពេលកន្លងមករបស់ក្រសួងសេដ្ឋកិច្ច និងហិរញ្ញវត្ថុ។
ឯកឧត្តម អភិបាលខេត្ត បន្ថែមថា រាជរដ្ឋាភិបាលកម្ពុជាមានគោលនយោបាយកែទម្រង់ស៊ីជម្រៅលើគ្រប់វិស័យ ជាពិសេសកែទម្រង់ហិរញ្ញវត្ថុនៅរដ្ឋបាលថ្នាក់ជាតិ និងថ្នាក់ក្រោមជាតិ សំដៅការអភិវឌ្ឍនៅតាមខេត្ត ក្រុង ស្រុក ឃុំសង្កាត់ ភូមិ ឲ្យមានការរីកចំរើន។ដូច្នេះមន្រ្តីជំនាញ រដ្ឋបាល ស្រុក ក្រុង ឃុំ សង្កាត់ ទាំងអស់ត្រូវខិតខំរៀបចំផែនការថវិកាឆ្នាំ២០២១-២០២៣នេះ ឲ្យបានច្បាស់លាស់ ស្របតាមគោលការណ៍យុទ្ឋសាស្រ្ត និងបទដ្ឋាននានាដែលថ្នាក់ជាតិដាក់ឲ្យអនុវត្ត ដើម្បីសម្រេចបានជោគជ័យលើកការងារកែទម្រង់ស៊ីជម្រៅរបស់រាជរដ្ឋាភិបាល ជាពិសេសត្រូវយកចិត្តទុកដាក់បំពេញការងារខុសត្រូវខ្ពស់ទៅតាមតួនាទីភារៈកិច្ចរៀងៗខ្លួនក្នុងស្មារតីស្មោះត្រង់ មានសាមគ្គីឯកភាពផ្ទៃក្នុងឲ្យបានល្អ៕
