រថយន្តដឹកអេតចាយ១គ្រឿង រងការខូចខាតស្ទើទាំងស្រុង ដោយសាឆ្លងប្រព័ន្ធភ្លើង បណ្តាលឲ្យយ៉ាងសន្ធោសន្ធៅ
រាជធានីភ្នំពេញ៖ប្រជាពលរដ្ឋភ័យព្រលឹងចុង ដោយសាមានរថយន្តដឹកទំនិញអេតចាយ១គ្រឿង នៅសុខៗស្រាប់តែរអិលបុកទ្វារចេញមកក្រៅឃ្លាំង និងបានឆាបឆេះយ៉ាងសន្ធោសន្ធៅ សង្ស័យឆ្លងប្រព័ន្ធភ្លើង បង្កឲ្យមានការភ្ញាក់ផ្អើល កាលពីវេលាម៉ោង២និង៣០នាទីរំលងអាធ្រាត្រ ឈានចូលថ្ងៃទី១៣ ខែកក្កដា ឆ្នាំ២០២០ នៅឃ្លាំងស្តុកអេតចាយដ៏ធំមួយកន្លែង ស្ថិតនៅតាមបណ្តោយផ្លូវ២១៧ ជិតនឹងហ្គារ៉ាក់សាំងកាលតិច សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ រថយន្តដែលមានស្លាកលេខភ្នំពេញ3D-5486ខាងលើនេះ ស្ថិតនៅក្នុងឃ្លាំងដូចសព្វដង លុះពេលដល់វេលាម៉ោងកើតហេតុខាងលើ ស្រាប់តែលឺសំលេងផ្ទុះ ហើយរថយន្តនោះក៏រអិលបុកក្លោងទ្វារ ចេញមកខាងក្រៅឃ្លាំង បង្កឲ្យមានអណ្តាតភ្លើងឆាបឆេះយ៉ាងសន្ធោសន្ធៅ ធ្វើឲ្យម្នាក់ៗភ័យស្លន់ស្លោរត់ទៅយកបំពងអគ្គិភ័យបាញ់ អស់ជាច្រើនបំពងទើបរលត់ទៅវិញ ដោយមិនបានឆេះរាលដាលដល់ផ្ទះអ្នកជិតខាងឡើយ។
ប្រភពបន្ថែមទៀតថា ហេតុការណ៍នេះសង្ស័យមកពីឆ្លងប្រព័ន្ធភ្លើងរថយន្ត និងមិនបានដោះចង្កឹះលេខ ទើបបណ្តាលឲ្យឆេះបែបនេះ៕
