នគរបាលចាប់បញ្ជូន ប្ដីកំណាចទាញពូថៅ កាប់ប្រពន្ធ បណ្តាលឲ្យរបស់ធ្ងន់ ដោយសារជម្លោះក្នុងគ្រួសារបន្តិចបន្តួច
ខេត្តបន្ទាយមានជ័យ៖កម្លាំងនគរបាលស្រុកស្វាយចេក បានចុះធ្វើការឃាត់ខ្លួនជនសង្ស័យ ដែលត្រូវជាប្ដីជនរងគ្រោះ បន្ទាប់ពីប្រើហឹង្សា ដោយយកពូថៅកាប់ប្រហារទៅលើប្រពន្ធរបស់ខ្លួន បណ្តាលឲ្យរងរបួសធ្ងន់ ត្រូវបានសាច់ញាតិនាំយកទៅសង្រ្គោះបន្ទាន់ នៅមន្ទីរពេទ្យបង្អែកក្រុងប៉ោយប៉ែត
ដោយសារតែមានជម្លោះក្នុងគ្រួសារបន្តិចបន្តួច។
ហេតុការណ៍នេះបានកើតឡើងកាលពីវេលាម៉ោង៤ល្ងាច ថ្ងៃទី៣០ ខែមិថុនា ឆ្នាំ២០២០ ស្ថិតនៅក្នុងភូមិបឹងស្នោ ឃុំស្លក្រាម ស្រុកស្វាយចេក ខេត្តបន្ទាយមានជ័យ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានឲ្យដឹងថា ស្តី្ររងគ្រោះជា ប្រពន្ធមានឈ្មោះ ធន លាងហាន អាយុ៣៨ឆ្នាំ និងប្តីឈ្មោះ ស៊ិន ស៊ីសុផាត អាយុ៣៨ឆ្មាំ រស់នៅភូមិបឹងស្នោ ឃុំស្លក្រាម ស្រុកស្វាយចេក ខេត្តបន្ទាយមានជ័យ។
លោកអធិការបានបញ្ជាក់ថា នៅមុនពេលកើតហេតុ បុរសជាប្តីបានស្រវឹងស្រា មកដល់ផ្ទះបង្កជាជម្លោះជា មួយប្រពន្ធកើតជារឿងឈ្លោះប្រកែកគ្នា ដោយអំណាចស្រាចូលពោះភ្លេចស្មារតី បានយកពូថៅកាប់ទៅលើប្រពន្ធចំក្បាលចំនួន២ពូថៅ បណ្តាលឲ្យបែកក្បាលហូរឈាមរត់ឲ្យអ្នកជិតខាងជួយ ស្របពេលនោះញាតិជិតខាងបានដឹកទៅព្យាបាលនៅមន្ទីរពេទ្យក្រុងប៉ោយប៉ែត ដើម្បីសង្គ្រោះបន្ទាន់។ចំណែកប្តីត្រូវបានប្រជាពលរដ្ឋ មេភូមិ និងកម្លាំងប្រជាការពារចាប់ឃាត់ខ្លួន ប្រគល់ឲ្យកម្លាំងនគរបាលប៉ុស្តិ៍រដ្ឋបាល និងនាំខ្លួនទៅធ្វើការសាកសួរនៅអធិការដ្ឋាននគរបាលស្រុកស្វាយចេក។
នៅចំពោះមុខសមត្ថកិច្ច ជនដៃដល់បានសារភាពថា ខ្លួនពិតជាយកពូថៅកាប់ទៅលើកប្រពន្ធ២ពូថៅពិតប្រាដក ដោយសារស្រវឹងខ្លាំង។ដោយផ្អែកលើចម្លើយសារភាព និងការប្រព្រឹត្តល្មើសជាក់ស្តែង ជនសង្ស័យត្រូវបានកម្លាំងនគរបាលជំនាញព្រហ្មទណ្ឌ អធិការដ្ឋាននគរបាលស្រុកស្វាយចេក រៀបចំសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការបន្តតាមនិតិវិធីច្បាប់៕
