ឯកឧត្តម ជាវ តាយ អភិបាលខេត្តកំពត ទទួលជួបប្រតិភូសភាពាណិជ្ជកម្មខេត្តកំពត-កែប
ខេត្តកំពត៖ឯកឧត្តម ជាវ តាយ អភិបាល នៃគណ:អភិបាលខេត្តកំពត បានស្នើទៅសភាពាណិជ្ជកម្មខេត្តកំពត-កែប ជម្រុញដល់ការសាងសង់ផ្សារនៅតាមច្រកទ្វារព្រំដែន ស្របតាមអនុសាសន៍ សម្តេចតេជោ នាយករដ្ឋមន្ត្រី ដើម្បីចរាចរទំនិញបានឆាប់រហ័ស និងស្របច្បាប់។
ឯកឧត្តមអភិបាលខេត្តស្នើបែបនេះ ខណ:ដែលប្រតិភូសភាពាណិជ្ជកម្មខេត្តកំពត-កែប ដឹកនាំដោយលោក ហាក់ សុវណ្ណា ចូលជួបសំដែងការគួរសម ពិភាក្សាការងារ និងរាយការណ៍អំពីវឌ្ឍនៈភាពការងាររបស់សភាពាណិជ្ជកម្មកំពត-កែ នាព្រឹក ថ្ងៃអង្គារ ៤រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៩ ខែមិថុនា ឆ្នាំ២០២០។
នៅក្នុងជំនួបដ៏មានអត្ថន័យនេះ ឯកឧត្តម អភិបាលខេត្ត បានសម្ដែងការស្វាគមន៍ចំពោះ ប្រតិភូសភាពាណិជ្ជកម្មខេត្តកំពត-កែប ជួបពិភាក្សាការងារនាពេលនេះ និង មានប្រសាសន៍ថា សភាពាណិជ្ជកម្មខេត្តកំពត-កែប កន្លងមកបានរួមចំណែកយ៉ាងសំខាន់ក្នុងការអភិវឌ្ឍន៍ប្រទេសយើងឲ្យរីកចម្រើន ពិសេសខេត្តកំពត ហើយពេលបច្ចុប្បន្ននេះ កំណើនភ្ញៀវទេសចរក្នុងខេត្តបានកើនឡើង ពិសេសតំបន់អេកូទេសចរណ៍ ដែលទាក់ទាញភ្ញៀវទេសចរយ៉ាងច្រើន ក្នុងនោះប្រមាណភ្ញៀវទេសចរ ៥២% បានទៅលេងនៅតំបន់ទឹកឈូ។
ជាមួយគ្នានេះលោក ហាក់ សុវណ្ណា ប្រធានសភាពាណិជ្ជកម្មខេត្តកំពត-កែប បានជម្រាបជូនអំពី តួនាទីរបស់សភាពាណិជ្ជកម្មខេត្ត មានតួនាទី ៖
១.សម្របសម្រួលជាមួយ វិស័យសាធារណៈ និងវិស័យឯកជន សំដៅធ្វើយ៉ាងណាឲ្យវិស័យទាំង២នេះមានសុខដុមនីយកម្មជាមួយគ្នា ។
២.កៀរគរវិនិយោគិនទាំងក្នុងស្រុក និងក្រៅស្រុក មកវិនិយោគទុកក្នុងខេត្តយើង។
លោកបន្តថា កន្លងមក មានវិនិយោគគិនជាច្រើនបានចាប់អារម្មណ៍ខេត្តកំពតខ្លាំង ដោយឡែកក្នុងខេត្តយើងមិនទាន់មានផែនទី កំណត់សម្រាប់អនុវត្ត តំបន់កសិកម្មតំបន់ណា តំបន់កសិឧស្សាហកម្មតំបន់ណា តំបន់អេកូទេសចរណ៍តំបន់ណា ដូចនេះ សភាពាណិជ្ជកម្មខេត្ត ស្នើសុំធ្វើការនេះជាមួយរដ្ឋបាលខេត្ត និងមន្ទីរជំនាញ ដើម្បីងាយស្រួលនាពេលក្រោយ បង្ហាញដល់វិនិយោគគិនផងដែរ៕
