ប្រកាសផ្ទេរភារកិច្ច អភិបាលរង ស្រុកស្ទឹងហាវ ខេត្តព្រះសីហនុ
ខេត្តព្រះសីហនុ៖លោក តុប ពេញ អភិបាលរងស្រុកស្ទឹងហាវថ្មី បានធ្វើការប្តេជ្ញាចិត្តខិតខំអនុវត្តការងារ ជាជំនួយការអភិបាលលើភារកិច្ចនានាដែលប្រគល់ និងធានានិរន្តរភាពកិច្ចការប្រចាំថ្ងៃរបស់ក្រុមប្រឹក្សា និងគណៈអភិបាលឱ្យបានល្អ។អនុវត្តការងារធានាឱ្យអង្គភាព បុគ្គលិករបស់ក្រុមប្រឹក្សា អនុវត្តសេចក្តីសម្រេចរបស់ក្រុមប្រឹក្សា និងគណៈអភិបាលឱ្យបានល្អ។អនុវត្តរាល់ផែនការ និងសេចក្តីសម្រេចរបស់ក្រសួង ខេត្ត ស្រុក ឱ្យបានល្អ។រក្សាសាមគ្គីភាពផ្ទៃក្នុងរវាងអភិបាល អភិបាលរង បុគ្គលិក ក្រុមប្រឹក្សា និងគណៈអភិបាល ព្រមទាំងការិយាល័យ អង្គភាពនានា ជុំវិញស្រុកឱ្យបានល្អ ។
លោក តុប ពេញ ធ្វើការប្តេជ្ញាចិត្តបែបនេះ ខណ:ដែលលោកត្រូវបានថ្នាក់ដឹកនាំខេត្ត ប្រកាសតែតាំងជាអភិបាលរងស្រុកស្ទឹងហាវថ្មី នាព្រឹកថ្ងៃសុក្រ ១៥កើត ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី៥ ខែមិថុនា ឆ្នាំ២០២០ ក្រោមអធិបតីភាពឯកឧត្តម ជាម ហ៊ីម ប្រធានក្រុមប្រឹក្សាខេត្ត ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ និងមានការចូលរួមពីឯកឧត្ដមសមាជិកក្រុមប្រឹក្សាខេត្ត លោកនាយករដ្ឋបាលសាលាខេត្ត ប្រធានមន្ទីរ អង្គភាព មន្ត្រីរាជការ នៃសាលាស្រុកស្ទឹងហាវផងដែរ។
តាមសេចក្តីប្រកាសលេខ ២៣២៨ប្រក ស្តីពីការផ្ទេរភារកិច្ចមន្ត្រីរាជការចំនួន ០២រូប ឱ្យកាន់មុខតំណែងជាអភិបាលរងស្រុក នៅក្នុងខេត្តព្រះសីហនុ ១.លោក ទេព មុនី ឋានន្តរស័ក្តិអនុមន្ត្រីថ្នាក់លេខ១ ពីអភិបាលរង នៃគណៈអភិបាលស្រុក ស្ទឹងហាវ ឱ្យទៅកាន់តំណែងជាអភិបាលរងនៃគណៈអភិបាលស្រុកកំពង់សិលា។ ២.លោក តុប ពេញ ឋានឋានន្តរស័ក្កនាយក្រមការ ថ្នាក់លេខ២ ពីអភិបាលរង នៃគណៈអភិបាលស្រុកកំពង់សិលា ឱ្យទៅកាន់មុខតំណែងជាអភិបាលរងនៃគណៈអភិបាលស្រុកស្ទឹងហាវ ។
ក្នុងឱកាសនោះដែរឯកឧត្តម គួច ចំរើន អភិបាលខេត្តព្រះសីហនុ មានប្រសាសន៍ផ្តាំផ្ញើដល់មន្ត្រីរាជការ កងកម្លាំងប្រដាប់អាវុធមានដូចជា៖
១-ពង្រឹងការងារសន្តិសុខនយោបាយក្នុងមូលដ្ឋាន។
២-សណ្តាប់ធ្នាប់សាធារណៈ ដឹកនាំដោយឈរលើគោលការណ៍ច្បាប់។
៣-ការងារអភិវឌ្ឍមូលដ្ឋានការប្រើប្រាស់កញ្ចប់ថវិការបស់ស្រុក និងឃុំ មានតម្លាភាព កុំថាលុយច្រើន រឿងច្រើនគឺលុយច្រើនមាន សមិទ្ធផលច្រើន។
៤-ការងារស្រង់ស្ថិតិប្រជាពលរដ្ឋក្រីក្រ រងផលប៉ះពាល់នឹងកូវីដ១៩ ត្រៀមការងារជួយសង្គ្រោះ និងផ្សព្វផ្សាយអំពីអាកាសធាតុ។
៥-របៀបរបបការងារអនុវត្តតាមច្បាប់ និងលិខិតបទដ្ឋានបច្ចេកទេស។ត្រូវធ្វើការតាមច្បាប់កុំធ្វើការតាមទម្លាប់ និងបង្កើនសមត្ថភាព។
៦-ការផ្សព្វផ្សាយព័ត៌មាន ត្រូវបង្កើតផេក ឬហ្វេសប៊ុកផ្ទាល់ខ្លួន ដើម្បីផ្សព្វផ្សាយសកម្មភាពការងារទទួលសំណើរ និងបកស្រាយបានទាន់ពេលវេលា។ចាប់ពីឆ្នាំ២០២១តទៅ ដាក់ឱ្យមានការប្រឡងប្រណាំងតាមរយៈហ្វេសបុក ឬផេករបស់មេឃុំ ចៅសង្កាត់។
៧-បញ្ហាកូវីដ១៩ ទោះបីកម្ពុជាថមថយ តែត្រូវប្រុងប្រយ័ត្នបន្តទៀត ខេត្តព្រះសីហនុ រកឃើញជំងឺ Covid-១៩ ចំនួន ៤០នាក់ ព្យាបាលជាសះស្បើយ ដូច្នេះយើងមិនត្រូវធ្វេសប្រហែស ព្រោះមកដល់ពេលនេះមិនទាន់មានប្រទេសណារកឃើញវាក់សាំង ឬថ្នាំព្យាបាលជំងឺនេះនៅឡើយទេ។
៨-ករណីទំនាស់ដីធ្លីត្រូវរួមគ្នាដោះស្រាយ បើមន្ត្រីយើងមានការពាក់ព័ន្ធ សូមដកខ្លួន កុំពាក់ព័ន្ធទៀត ដើម្បីសន្តិសុខ សុវត្ថិភាពក្នុងសហគមន៍មូលដ្ឋាន៕
