ជនសង្ស័យ៥នាក់ ត្រូវបានកម្លាំងនគរបាលក្រុងសិរីសោភ័ណ ចាប់ឃាត់ខ្លួនជក់ និងលក់គ្រឿងញៀន
ខេត្តបន្ទាយមានជ័យ៖កម្លាំងនគរបាលជំនាញប្រឆាំងគ្រឿងញៀន នៃអធិការដ្ឋាននគរបាលក្រុងសិរីសោភ័ណ បានចុះប្រតិបត្តិការណ៍បង្រ្កាបករណីប្រើប្រាស់ និងជួញដូរគ្រឿងញៀន ដោយឃាត់ខ្លួនជនសង្ស័យបានចំនួន៥នាក់ កាលពីព្រឹកថ្ងៃទី៣ ខែមិថុនា ឆ្នាំ២០២០ ស្ថិតនៅក្នុងភូមិភ្នំបាក់ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ឯកស៊ី ឌី អធិការនគរបាលក្រុងសិរីសោភ័ណ បានឲ្យដឹងថា ជនសង្ស័យទាំង៥នាក់នេះ ជាមុខសញ្ញាលក់ដូរ និងជក់ថ្នាំញៀនយ៉ាងសកម្មកន្លងមកមានឈ្មោះ ណារិទ្ធ ដេវីដ ភេទប្រុស អាយុ១៨ឆ្នាំ នៅភូមិភ្នំបាក់ សង្កាត់ទឹកទឹកថ្លា ក្រុងសិរីសោភ័ណ ខេត្តបន្ទាយមានជ័យ ជននេះគឺជាមុខសញ្ញា ជួញដូរនិងផ្តល់ទីតាំងផ្ទះឲ្យអ្នកជក់ផងដែរ ដែលកម្លាំងនគរបាលក្រុងសិរីសោភ័ណ បានធ្វើការស៊ើបអង្កេតជាយូរមកហើយ និងបានចាប់ឃាត់ខ្លួនអ្នកជក់ចំនួន៤នាក់បន្ថែមទៀត។
លោកអធិការបានបញ្ជាក់ទៀតថា ក្នុងការបង្រ្កាបនេះ សមត្ថកិច្ចបានធ្វើការដកហូតបានវត្ថុតាងថ្នាំញៀនប្រភេទម្សៅក្រាម ពណ៌សថ្លាចំនួន៣ថង់តូច កូនថង់សម្រាប់ច្រកមួយចំនួន ពូថៅ១ដើម កាំបិតចំនួន២ដើម ទូរស័ព្ទដៃចំនួន៣គ្រឿង ម៉ូតូចំនួន៤គ្រឿង និងឧបករណ៍សម្រាប់ជក់មួយចំនួន។
បច្ចុប្បន្នជនសង្ស័យ រួមទាំងវត្ថុតាង ត្រូវបានកម្លាំងនគរបាលជំនាញប្រឆាំងគ្រឿងញៀនបានកសាងសំណុំរឿង ដើម្បីបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តតាមនិតិវិធីច្បាប់៕
