ពិធីប្រគេនទេយ្យវត្ថុ និងទៀនចំណាំព្រះវស្សា ជូនដល់ព្រះសង្ឃគ្រប់វត្តអារាមចំនួន១៥២វត្ត
ខេត្តកំពត៖ដើម្បីគាំទ្រវិស័យព្រះពុទ្ធសាសនា ក្នុងរដូវចូលកាន់ព្រះវស្សារបស់ភិក្ខុ សាមណេរ ទៅតាមពុទ្ធបញ្ញត្តនិងទំនៀមទំលាប់ប្រពៃណីដ៏ផូរផង់របស់ខ្មែរ នាព្រឹកថ្ងៃសៅរ៍ ៧កើត ខែ អាសាឍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី ២៧ ខែ មិថុនា ឆ្នាំ២០២០ ឯកឧត្តម បណ្ឌិត ប៉ែន ស៊ីម៉ន តំណាងរាស្ត្រមណ្ឌលកំពត និងជាប្រធានគណៈកម្មការទី១០នៃរដ្ឋសភា អមដំណើរដោយឯកឧត្តម ជាវ តាយ អភិបាល នៃគណ:អភិបាលខេត្ត និងលោកជំទាវ រួមជាមួយ ឯកឧត្តម ជឹង ផល្លា ប្រធានក្រុមប្រឹក្សាខេត្ត ឯកឧត្តម លោកជំទាវ សមាជិកក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ បាននាំយកទេយ្យវត្ថុ និងទៀនចំណាំព្រះវស្សា ជូនដល់ព្រះសង្ឃគ្រប់វត្តអារាម នៅក្នុងស្រុកអង្គរជ័យ ស្រុកបន្ទាយមាស ស្រុកដងទង់ និងស្រុកកំពង់ត្រាច។
ពិធីនេះបានធ្វើឡើងនៅក្នុងឃុំសំរោងក្រោម ស្រុកបន្ទាយមាស ខេត្តកំពត ដោយមានការអញ្ជើញចូលរួមពីព្រះសង្ឃ យាយជីតាជី បងប្អូនពុទ្ធិបរិស័ទ្ធយ៉ាងច្រើនកុះករ ផងដែរ។
នៅក្នុងពិធីនេះដែរ ឯកឧត្តម បណ្ឌិត ប៉ែន ស៊ីម៉ន តំណាងរាស្ត្រមណ្ឌលកំពត និងជាប្រធានគណៈកម្មការទី១០ នៃរដ្ឋសភា បានប្រគេននូវទេយ្យវត្ថុ និងទៀនចំណាំព្រះវស្សា មួយអន្លើដោយគ្រឿងបរិក្ខាផ្សេងៗ ដែលរៀបចំដោយរដ្ឋបាលខេត្តកំពត ជូនដល់វត្តទាំង ១៥២ វត្ត ក្នុងស្រុកបន្ទាយមាស ស្រុកអង្គរជ័យ ស្រុកដងទង់ និងស្រុកកំពង់ត្រាច ដោយក្នុង១វត្តទទួលបាន៖
-ទៀនចំណាំព្រះវស្សា១គូរ
-អង្ករ ៥០ គីឡូក្រាម
-អំបិល ៥០ គីឡូក្រាម
-ទឹកក្រូច ២កេះ
-ទឹកស៊ីអ៊ីវ ១យួរ
-បច្ច័យ ១០០.០០០រៀល (ដប់ម៉ឺនរៀល)
-បច្ច័យផ្ទាល់ខ្លួនរបស់ឯកឧត្តម បណ្ឌីត ប៉ែន ស៊ីម៉ន ចំនួន ១០០.០០០រៀល (ដប់ម៉ឺនរៀល)ផងដែរ៕
