ស្ត្រីម្នាក់ ត្រូវរន្ទះបាញ់ស្លាប់យ៉ាងអាណោចអធម នៅកណ្តាលចំការដំឡូង ខណៈស៊ីឈ្នួលជំរះស្មៅដំឡូងឲ្យគេ
ខេត្តបន្ទាយមានជ័យ៖ស្ត្រីម្នាក់ ត្រូវរន្ទះបាញ់ស្លាប់ភ្លាមៗនៅកណ្តាលចំការដំឡូង កាលពីថ្ងៃទី០១ ខែមិថុនា ឆ្នាំ២០២០ ខណៈស៊ីឈ្នួលជំរះស្មៅដំឡូងឲ្យគេ នៅក្នុងភូមិសាស្ត្រព្រំប្រទល់រវាងខេត្តបន្ទាយមានជ័យ និងខេត្តឧត្តរមានជ័យ។
លោកវរសេនីយ៍ឯក សៅ សារឿន អធិការនគរបាលស្រុកថ្មពួក បានឲ្យដឹងថា ជនរងគ្រោះមានឈ្មោះ ឆាន សុភា ភេទស្រី អាយុ២៣ឆ្នាំ ជាពលរដ្ឋរស់នៅភូមិស្រែល្អ ឃុំគោករមៀត ស្រុកថ្មពួក ខេត្តបន្ទាយមានជ័យ។
លោកអធិការបញ្ជាក់ថា មុនកើតហេតុជនរងគ្រោះ បានទៅស៊ីឈ្នួលជំរះស្មៅដំឡូងឲ្យគេ ក្នុងភូមិសាស្ត្រកើតហេតុខាងលើ លុះដល់វេលាម៉ោងប្រមាណ៣រសៀលក៏មានភ្លៀងធ្លាក់ ភ្លាមនោះជនរងគ្រោះបានយកទូរស័ព្ទច្រកក្នុងថង់ និងមូលចង្កះសំពត់ ស្រាប់តែត្រូវរន្ទះបាញ់បណ្តាលឲ្យជនរងគ្រោះស្លាប់ភ្លាមៗនឹងកន្លែងតែម្តង។
ក្រោយកើតហេតុសពជនរងគ្រោះ ត្រូវបានក្រុមគ្រួសារទទួលយកទៅធ្វើបុណ្យតាមប្រពៃណី នៅខេត្តឧត្តរមានជ័យ៕
![]()
![]()
![]()