បុរសវ័យចំណាស់ម្នាក់ ស្តារពាងដោយប្រើម៉ូទ័របូមខ្វះកាប្រុងប្រយ័ត្ន ឆ្លងចរន្តអគ្គីសនី ឆក់ស្លាប់យ៉ាងអាណោចអាធម៌
ខេត្តបន្ទាយមានជ័យ៖បុរសវ័យចំណាស់ម្នាក់បានស្លាប់ចោលប្រពន្ធ និងកូន ខណៈពេលបញ្ជូនទៅដល់មន្ទីរពេទ្យ ដោយសារស្តារពាងដោយប្រើម៉ូទ័របូមខ្វះកាប្រុងប្រយ័ត្ន ឆ្លងចរន្តអគ្គីសនីឆក់
ខណៈមេឃកំពុងរកធ្លាក់ភ្លៀង។
ករណីនេះបានកើតឡើងកាលពីវេលាម៉ោង៦យប់ ថ្ងៃទី១៤ ខែមិថុនា ឆ្នាំ២០២០ ស្ថិតនៅភូមិកោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា ជនរងគ្រោះមានឈ្មោះ ជិន ម៉ៅ ភេទប្រុស អាយុ៦០ឆ្នាំ រស់នៅភូមិ កោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។
លោកអធិការបានបន្តថា តាមការរៀបរាប់ពីប្រពន្ធឈ្មោះ យូ សុភាព អាយុ៦០ឆ្នាំ បានឲ្យដឹងថា នៅមុនពេលកើតហេតុនោះ ខណៈមេឃកំពុងរកធ្លាក់ភ្លៀង ប្តីរបស់គាត់បានដាក់ម៉ូទ័រស្តារទឹកក្នុង ពាងចាស់ចោលត្រៀមចាំត្រងទឹកភ្លៀង លុះស្តារទឹកបានចំនួន២ពាង ស្រាប់តែឆ្លងចរន្ត បណ្តាលឲ្យឆក់ ភ្លាមៗនោះក្រុមគ្រួសារបានដឹកគាត់យកទៅសង្រ្គោះនៅមន្ទីរពេទ្យ តែជាអកុសលប្តីរបស់គាត់ បានដាច់ខ្សល់ស្លាប់នៅមន្ទីរពេទ្យតែម្តង។
លោកអធិការបានបញ្ជាក់ថា ក្រោយពីទទួលបានព័ត៌មាននេះភ្លាម លោកបានចាត់កម្លាំងជំនាញ ចុះទៅពិនិត្យសពឃើញមានស្លាកស្នាមខ្សែភ្លើងឆក់ចំនួន២កន្លែង មួយកន្លែងរបកស្បែកនៅលើដើមទ្រូង និងមួយកន្លែងទៀត នៅលើប្រអប់ដៃខាងឆ្វេង។
ដូច្នេះជំនាញសន្និដ្ឋានថា ជនរងគ្រោះគឺពិតជាស្លាប់ដោយខ្សែ ភ្លើងឆក់ពិតប្រាកដមែន។ក្រោយពីពិនិត្យសពរួច បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
