យុវជនម្នាក់ទិញឥវ៉ាន់ នៅពេលយប់ឲ្យម្តាយលក់ ត្រូវរថយន្តធុនធំ បុកស្លាប់យ៉ាងអណោចអាធ័ម នៅស្រុកស្វាយចេក
ខេត្តបន្ទាយមានជ័យ៖ឧបទ្ទវហេតុគ្រោះថ្នាក់ចរាចរណ៍ដ៏រន្ធត់មួយបានកើតឡើង ដោយរថយន្តធុនធំ បុកយុវជនម្នាក់ស្លាប់យ៉ាងអណោចអាធ័មបំផុត នៅវេលាម៉ោង៣និង៤៤នាទីទាបភ្លឺ ថ្ងៃទី១៥ ខែមិថុនា ឆ្នាំ២០២០ នៅលើកំណាត់ផ្លូវជាតិលេខ៥៦ A ចំណុចទល់មុខក្លោងទ្វារវត្តពោធិតាបែន ស្ថិតក្នុងភូមិគោករការ ឃុំតាបែន ស្រុកស្វាយចេក ខេត្តបន្ទាយមានជ័យ ខណៈជិះម៉ូតូទៅទិញឥវ៉ាន់ នៅពេលយប់ឲ្យម្តាយលក់។
មន្ត្រីនគរបាលមូលដ្ឋាន បានឲ្យដឹងថា ជនរងគ្រោះមានឈ្មោះ អឿន ឡាយហាំង ភេទប្រុស អាយុ២២ឆ្នាំ រស់នៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។
មន្ត្រីនគរបាលមូលដ្ឋានបានឲ្យបន្តថា មុនពេលកើតហេតុ យុវជនរងគ្រោះបានជិៈម៉ូតូម៉ាកអៀ រ៉ក ពណ៍ខ្មៅ គ្មានស្លាកលេខទៅទិញឥវ់ាន់ឲ្យម្តាយលក់ លុះពេលជិៈចេញពីភូមិ ឡើងមកថ្នល់ជាតិមិនបានមើលឆ្វេងស្តាំ ដោយធ្វើដំណើរពីជើងទៅត្បូងមកដល់ចំណុចកើតហេតុ ត្រូវរថយន្តធុនធំ ធ្វើដំណើរច្រាសទិសគ្នាបុកចំពេញទំហឹងបណ្តាលឲ្យជនរងគ្រោះស្លាប់ភ្លាមៗ នៅនឹងកន្លែង ។ចំណែកអ្នកបករថយន្ត ក្រោយពីកើតហេតុ បានបើករត់គេចខ្លួនបាត់ស្រមោលឈឹង។
ក្រោយកើតហេតុសាកសពជនរងគ្រោះ ត្រូវបាននគរបាលចរាចរណ៍ ប្រគល់ជូនក្រុមគ្រួសារ យកទៅចាត់ចែងធ្វើបុណ្យតាមប្រពៃណី។ចំណែកម៉ូតូយកមករក្សាទុកនៅប៉ុស្តិ៍រដ្ឋបាល ឃុំតាបែនរងចាំប្រគល់ជូនក្រុមគ្រួសារជនរងគ្រោះវិញនៅពេលក្រោយ៕
