រដ្ឋបាលខេត្តកំពត ប្រគល់ និងទទួល ព្រះរាជក្រឹត្យ ផ្ដល់សញ្ជាតិខ្មែរ ព្រមទាំងប័ណ្ណកម្មសិទ្ធដីធ្លីចំនួន០៧កន្លែង ជូនដល់លោក អូប្រាយអិន ហ្សកអាឡិន ហៅ (ថម )ជនជាតិអាមេរិកសញ្ជាតិអាមេរិក
ខេត្តកំពត៖ នារសៀលថ្ងៃទី៨ ខែឧសភា ឆ្នាំ២០២០ រដ្ឋបាលខេត្តកំពតបានធ្វើពិធីប្រគល់ និងទទួលព្រះរាជក្រឹត្យ តាមត្រាស់បង្គាប់របស់ព្រះមហាក្សត្រនៃព្រះរាជាណាចក្រកម្ពុជា ដើម្បីផ្ដល់សញ្ជាតិខ្មែរ ជូនដល់ជនជាតិអាមេរិកសញ្ជាតិអាមេរិកម្នាក់មានសិទ្ធស្នាក់និងរស់នៅក្នុងប្រទេសកម្ពុជា ព្រមទាំងប័ណ្ណកម្មសិទ្ធដីធ្លីចំនួន០៧កន្លែង។
ពិធីនេះធ្វើឡើង ក្រោមវត្តមានចូលរួម ពីឯកឧត្តមជាវ តាយ អភិបាលនៃគណៈអភិបាលខេត្ត ឯកឧត្តម ដួង តារា ជំនួយការផ្ទាល់សម្ដេចតេជោនាយករដ្ឋមន្ត្រី ព្រមទាំងវត្តមានឯកឧត្តម អភិបាលរងខេត្ត ថ្នាក់ដឹកនាំ អង្គភាពចំណុះសាលាខេត្ត និងអាជ្ញាធរមូលដ្ឋានពាក់ព័ន្ធផងដែរ។ឯកឧត្តមដួង តារា ជំនួយការផ្ទាល់សម្ដេចតេជោហ៊ុនសែន បានបញ្ជាក់ថា ស្របតាមការណែនាំដ៏ខ្ពង់ខ្ពស់ របស់សម្ដេចតេជោ ហ៊ុន សែន ដែលតែងតែបានចាត់ទុកអាមេរិកគឺជាមិត្តភក្កិល្អជាមួយកម្ពុជា។ហើយក្នុងករណីលោក (ថម) កន្លងមកនេះមានការរំលោភបំពាន ពីដៃគូរកស៊ីជាមួយគ្នា នឹងមានដំណោះស្រាយរកយុត្តិធម៌តាមគោលការណ៍ឈ្នះឈ្នះទាំងអស់គ្នា ដែលដំណោះស្រាយនេះត្រូវបានសម្ដេចតេជោ មានការកោតសរសើរនិងគាំទ្រយ៉ាងខ្លាំង។
ហើយចំពោះករណីលោក(ថម)នេះដែរ រាជរដ្ឋាភិបាល គឺសម្ដេចតេជោជាប្រមុខដឹកនាំ នៅពេលបានដឹងថា មានការរំលោភបំពានពីដៃគូរកស៊ីជាមួយគ្នា សម្ដេចតេជោ តែងតែមានការអាណិតអាសូរ ជាពិសេសនៅពេលដឹងថា លោក (ថម) ត្រូវបានចូលនិវត្តន៍ហើយ សម្រេចចិត្តមករស់នៅប្រទេសកម្ពុជា ដែលបានជ្រើសរើសទីតាំងខេត្តកំពតជាកន្លែងជម្រើសចុងក្រោយរបស់ជីវិតលោក។
ថែមទាំងពិនិត្យឃើញសកម្មភាពរបស់លោក(ថម) មានគម្រោងផ្ទះសម្បែងដីធ្លី និងស្រឡាញ់ប្រទេសកម្ពុជាដោយបេះដូងរបស់គាត់ផ្ទាល់ សម្ដេចតេជោក៏ពេញចិត្ត សម្រេចទូលសុំព្រះមហាក្សត្រដើម្បីផ្ដល់សញ្ជាតិខ្មែរជូនលោក( ថម)ក្នុងក្ដីស្រឡាញ់ពេញបេះដូងជាសមាជិកគ្រួសារខ្មែរតែមួយ។
ជាមួយឱកាសនោះ ឯកឧត្តមដួង តារា ក៏បានសម្ដែងក្ដីសង្ឃឹមថា ចាប់ពីពេលនេះតទៅ លោក (ថម) និងធ្វើកិច្ចការរស់នៅស្របតាមច្បាប់ប្រទេសកម្ពុជា ហើយកិច្ចការខ្វះខាតត្រង់ណា សង្ឃឹមថារដ្ឋបាលខេត្តកំពត និងជួយសម្របសម្រួល ដើម្បីធ្វើឱ្យការរស់នៅលោក( ថម)នៅក្នុងប្រទេសកម្ពុជាយើងនេះសុខសប្បាយទាំងអស់គ្នា។
ក្នុងឱកាសនោះដែរ លោក (ថម) ក៏បានសម្ដែងអំណរគុណចំពោះសម្ដេចតេជោហ៊ុនសែន ដែលបានជួយរកយុត្តិធម៌ព្រមទាំង បានផ្ដល់សញ្ជាតិខ្មែរ ដើម្បីជាសិទ្ធិរស់នៅស្រមច្បាប់ ក្នុងប្រទេសកម្ពុជា ដែលជាទឹកដី ដែលលោកស្រលាញ់ពេញបេះដូង នៃជីវិតចុងក្រោយរបស់លោក(ថម)ផងដែរ៕
