កម្លាំងនគរបាលក្រុងបាត់ដំបង ចាប់ឃាត់ខ្លួនជនសង្ស័យ១នាក់ ពាក់ពន្ធ័ករណីគ្រឿងញៀន
ខេត្តបាត់ដំបង៖ដោយអនុវត្តតាមការនាំរបស់លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគបាលខេត្តបាត់ដំបង ក៏ដូចជាមតិណែនាំជំនាញពីលោកឧត្តមសេនីយ៍ត្រី កុយ ហៀង ស្នងការរងផែនការងារគ្រឿងញៀននៃស្នងការដ្ឋាន កាលពីវេលាម៉ោង ២០និង១០នាទី ថ្ងៃពុធ ១៥កើត ខែពិសាខ ឆ្នាំជូតទោស័ក ព. ស.២៥៦៣ ត្រូវនឹងថ្ងៃទី៦ ខែឧសភា ឆ្នាំ២០២០ កម្លាំងនគរបាលការិយាល័យប្រឆាំងគ្រឿង ញៀននិងកម្លាំងអន្តរាគមន៍ប្រឆាំងគ្រឿងញៀននៃស្នងការដ្ឋាន ដែលមានលោកវរសេនីយ៍ទោ សុខ និមល ជានាយការិយាល័យ រួមសហការណ៍ជាមួយកម្លាំងនគរបាលនៃអធិការដ្ឋាននគរបាលក្រុងបាត់ដំបង ដែលមានលោកវរសេនី យ៍ ឯក ឆាង វណ្ណឆៃ ជាអធិការនគរបាលក្រុង បានចុះបង្ត្រាបករណីជួញដូររក្សាទុកឬដឹកជញ្ជូនដោយខុសច្បាប់នូវសារធាតុញៀន០១ករណីក្នុងបទល្មើសជាក់ស្តែង ដោយឃាត់ខ្លួនជនសង្ស័យ១នាក់ នៅចំណុចភូមិវត្តលៀប សង្កាត់ចំការសំរោង ក្រុងបាត់ដំបង ខេត្តបាត់ដំបង។
សមត្ថកិច្ចបានឲ្យដឹងថា ជនសង្ស័យមានឈ្មោះ ប៊ុន សារិនកក្កដា ភេទប្រុស អាយុ៤៣ឆ្នាំ រស់នៅភូមិវត្តលៀប សង្កាត់ចំការសំរោង ក្រុងបាត់ដំបង ខេត្តបាត់ដំបង។
វត្ថុតាងដែលដកហូតបានរួមមាន៖
១-ថ្នាំញៀនប្រភេទមេតំហ្វេតាមីនម៉ាទឹកកក ICEចំនួន០១ថង់ ទម្ងន់១០០,១៨ក្រាម
២-អាវុធខ្លីចំនួន០១ដើមប្រើហ្កាស់បាញ់គ្រាប់កង់
៣-ទូរស័ព្ទដៃចំនួន០១គ្រឿង
៤-សៀវភៅបញ្ជីសម្រាប់ទូទាត់ចំនួន០១
៥-ដែកកេះចំនួន០២ជាសម្ភារ:សម្រាប់ជក់គ្រឿងញៀន។
ក្រោយពីឃាត់ខ្លួនការិយាល័យជំនាញបានធ្វើការសាកសួរ ស្រាវជ្រាវនិងរៀបចំបញ្ជូនទៅតុលាការ ដើម្បីចាត់ការបន្តតាមនិតិវិធី៕
