អបអរសាទរខួបអនុស្សាវរីយ៍លើកទី១៣៤ ទិវាពលកម្មអន្តរជាតិ០១ ឧសភា ឆ្នាំ២០២០ ក្រោមប្រធានបទ “សន្តិភាព និងការងារសមរម្យ”
ខេត្តស្ទឹងត្រែង៖នៅព្រឹកថ្ងៃសុក្រ ១០កើត ខែ ពិសាខ ឆ្នាំ ជូត ទោស័ក ព.ស ២៥៦៣ ត្រូវនឹងថ្ងៃទី០១ ខែឧសភា ឆ្នាំ២០២០ ឯកឧត្តម ឡូយ សុផាត អ្នកតំណាងរាស្រ្តមណ្ឌលស្ទឹងត្រែង និងជាប្រធានគណៈកម្មការទី៣ នៃរដ្ឋសភា និងឯកឧត្តម ម៉ុម សារឿន អភិបាលនៃគណៈអភិបាលខេត្ត ស្ទឹងត្រែងបានអញ្ជើញជាអធិបតីក្នុងពិធីអបអរសាទរខួបអនុស្សាវរីយ៍លើកទី១៣៤ ទិវាពលកម្មអន្តរជាតិ០១ ឧសភា ឆ្នាំ២០២០ ក្រោមប្រធានបទ “សន្តិភាព និងការងារសមរម្យ”។
ពិធីនេះបានធ្វើឡើងនៅក្រុមហ៊ុន ធី ប៊ី វាយ ប៊ី អង្គរបាណាណា ដែលមានការអញ្ជើញចូលរួមពីសំណាក់ឯកឧត្តម ឈាង ឡាក់ ប្រធានក្រុមប្រឹក្សាខេត្ត និងសមាជិកក្រុមប្រឹក្សាខេត្ត គណៈអភិបាលខេត្ត កម្លាំងប្រដាប់អាវុធទាំង៣ ប្រធានមន្ទីរអង្គភាពជុំវិញខេត្ត អភិបាលក្រុង ស្រុក និងមន្រ្តីពាក់ព័ន្ធ ព្រមទាំងកម្មករ កម្មការនី និយោជិត ជាច្រើនរូបទៀត។
ក្នុងឱកាសនោះដែរឯកឧត្តម ម៉ុម សារឿន អភិបាលនៃគណៈអភិបាលខេត្ត បានអានខ្លឹមសារទាំងស្រុងនូវសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងឱកាសខួបអនុស្សាវរីយ៍លើកទី១៣៤ទិវាពលកម្មអន្តរជាតិ០១ ឧសភា ឆ្នាំ២០២០ជូនអង្គពិធី។
ឯកឧត្តម ឡូយ សុផាត អ្នកតំណាងរាស្រ្តមណ្ឌលស្ទឹងត្រែង និងជាប្រធានគណៈកម្មការទី៣ នៃរដ្ឋសភា បានមានប្រសាសន៍សំណេះសំណាល និងផ្តាំផ្ញើដល់បង ប្អូនកម្មករ កម្មការនី និយោជិក និងនិយោជក់ ទាំងអស់សូមមានការប្រុងប្រយ័ត្ត រក្សាអនាម័យខ្ពស់ និងអនុវត្តតាមវិធានការការពាររបស់ ក្រសួងសុខាភិបាល ក៏ដូចជាមន្ទីរសុខាភិបាលខេត្ត ដើម្បីបង្ការ និងទប់ស្កាត់ការរីករាលដាលនូវជំងឺកូវីដ-១៩។
ទន្ទឹមនឹងនោះឯកឧត្តម អ្នកតំណាងរាស្រ្ត បានអំពាវនាវដល់និយោជក និងម្ចាស់សហគ្រាសនានា សូមមេត្តាពង្រឹងភាពស្និទ្ធស្នាល ជាមួយនិយោជិត កម្មករ និងយកចិត្តទុកដាក់ដល់សុខុមាលភាព និងសុវត្ថិភាពរបស់កម្មករ ព្រោះ ភាពជោគជ័យរបស់ក្រុមហ៊ុន ពិតជាត្រូវតែផ្សាភ្ជាប់ជាមួយសុខទុក្ខរបស់របស់កម្មករ៕
