ជនសង្ស័យចំនួន៥នាក់ ដែលកំពុងលួច លក់ និងជក់ថ្នាំញៀន នៅក្នុងភូមិសាស្ត្រ ក្រុងប៉ោយប៉ែត ត្រូវបានកម្លាំងនគរបាលចាប់ឃាត់ខ្លួន
ខេត្តបន្ទាយមានជ័យ៖កាលពីវេលាម៉ោង១២យប់ឈានចូល ថ្ងៃទី១៨ ខែឧសភា ឆ្នាំ២០២០ កម្លាំងនគរបាល ការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តបន្ទាយមានជ័យ បានចុះប្រតិបត្តិការណ៍បង្ក្រាប និងចាប់ឃាត់ខ្លួនជនសង្ស័យបានចំនួន៥នាក់ ខណៈដែលកំពុងលួច លក់ និងជក់ថ្នាំញៀននៅក្នុងភូមិសាស្ត្រ ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចបានឲ្យដឹងថា ជនសង្ស័យជាក្រុមក្មេងប្រើប្រាស់គ្រឿងញៀននៅទីតាំងដោយឡែកពីគ្នា ជនសង្ស័យទី១៖ឈ្មោះ អៀន គឹមហុង ភេទប្រុស អាយុ២៧ឆ្នាំ មុខរបរមិនពិតប្រាកដ មាននៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
ទី២៖ឈ្មោះ សន ចិន្តា ភេទប្រុស អាយុ៣៧ឆ្នាំ មុខរបរកសិករ មានទីលំនៅភូមិសាលាកំរើក សង្កាត់សាលាកំរើក ក្រុងសៀមរាប ខេត្តសៀមរាប។
ទី៣៖ឈ្មោះ អឿន តារ៉ា ភេទប្រុស អាយុ២៣ឆ្នាំ មុខរបរមិនពិតប្រាកដ មានទំនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត។
ទី៤៖ឈ្មោះ សេក ភារុន ភេទប្រុស អាយុ២៥ឆ្នាំ ស្នាក់នៅបន្ទប់ជួលភូមិអូរឬស្សី សង្កាត់ផ្សារកណ្តាល មុខរបរកម្មករ។
ទី៥៖ឈ្មោះ ទូច ចាន់ថា ភេទប្រុសអាយុ១៨ឆ្នាំ បន្ទប់ជួលភូមិអូរឬស្សី សង្កាត់ផ្សារកណ្តាល ។
សមត្ថកិច្ចបានបញ្ជាក់ថា ជាមួយនឹងការបង្រ្កាបនេះ សមត្ថកិច្ចធ្វើការដកហូតបានម្សៅក្រាមសថ្លាចំនួន៣កូនថង់តូចថ្នាំញៀនប្រភេទមេតំហ្វេតាមីនគ្រាប់ពណ៌ផ្កាឈូកចំនួនកន្លះគ្រាប់ ដបកែឆ្នៃសម្រាប់ជក់គ្រឿងញៀន២បំពង់ កែវ១កំណាត់ កំណាត់បំពង់បឺតឆ្នៃសម្រាប់ជក់គ្រឿងញៀនមួយចំនួន កាំបិតវែង២ដើម កូនកាំបិត៣ដើម សំបកថង់មួយចំនួន ដែកកេះ៣ និងទូរស័ព្ទដៃ៣គ្រឿង និងកាំភ្លើងខ្លីមិនស្គាល់ធុន អត់មានបង់ អត់មានគ្រាប់១ដើម ។
លោកវរសេនីយ៍ទោ ង៉េង សុជា ស្នងការរង ទទួលការងារប្រឆាំងគ្រឿងញៀនបានឲ្យដឹងដែរថា ជនសង្ស័យទាំង៥នាក់ និងវត្ថុតាងត្រូវបានកម្លាំងនគរបាលជំនាញ បានរៀបចំសំណុំរឿងបញ្ជូនទៅស្នងការខេត្ត និងកសាងឯកសារទៅសាលាដំបូងខេត្ត ដើម្បីចាត់ការតាមនិតិវិធីច្បាប់៕
