ឧបទ្ទវហេតុគ្រោះថ្នាក់ចរាចរណ៍ រវាងរថយន្ត និងរថយន្ត បណ្ដាលឲ្យរងរបួសធ្ងន់ ចំនួន៣នាក់នៅតាកែវ
ខេត្តតាកែវ៖យ៉ាងហោចណាស់មានមនុស្សចំនួន៣នាក់ រងរបួសធ្ងន់ បញ្ជូនទៅសង្គ្រោះនៅឯមន្ទរពេទ្យ ដោយសារតែគ្រោះថ្នាក់ចរាចរណ៍រវាងរថយន្ត និងរថយន្ត កាលពីវេលាម៉ោង២និង៤០នាទីរសៀលថ្ងៃទី១៧ ខែឧសភា ឆ្នាំ២០២០ ត្រង់ចំណុចខាងត្បូងចូលវត្តព្រៃតូច ស្ថិតនៅក្នុងភូមិគោកដូង ស្រុកកោះអណ្ដែត ខេត្តតាកែវ។
បើតាមប្រភព័ត៌មានបានឲ្យដឹងថា មុនជួបគ្រោះថ្នាក់ គេបានឃើញរថយន្តម៉ាក កាមារី ស៊េរី១៩៩១ ពណ៌ទឹកប៊ិចចាស់ ពាក់ផ្លាកលេខ ភ្នំពេញ 2E-6219 អ្នកបើកបរដោយឈ្មោះ សូ សីហា ភេទប្រុស អាយុ៤១ឆ្នាំ រស់នៅភូមិព្រៃផ្ដៅ ស្រុកកៀនសាំង ខេត្តស្វាយរៀង អ្នករួមដំណើរឈ្មោះ អៀ ធីតា ភេទស្រី អាយុ៤៣ឆ្នាំ ទីលំនៅភូមិព្រៃផ្ដៅ ស្រុកកៀនសាំង ខេត្តស្វាយរៀង បានធ្វើដំណើរពីត្បូង ទៅជើង បានបុកគូទរថយន្តម៉ាក សាំយ៉ុង ពណ៌ស ពាក់ផ្លាកលេខ ភ្នំពេញ 2AP-1660 ស៊េរី២០០២ រួចជ្រុលទៅបុករថយន្តមួយគ្រឿងទៀតម៉ាក សាំយ៉ុង ពណ៌លឿង ពាក់ផ្លាកលេខ ភ្នំពេញ 2AY-8370 ស៊េរី២០០០ បណ្ដាលឲ្យមនុស្សរងរបួសធ្ងន់៣នាក់ ដឹកបញ្ជូនទៅសង្គ្រោះនៅឯមន្ទីរពេទ្យ។
ក្រោយពីកើតហេតុកម្លាំងសមត្ថកិច្ចបាន ចុះដល់ទីតាំងបានធ្វើការវាស់វែង រួចយកវត្ថុតាងទៅរក្សាទុក នៅអធិការដ្ឋាននគរបាលស្រុក និងកសាងសំណុំរឿងទៅតាមនីតិវិធី៕
