លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគីរី ដឹកនាំកិច្ចប្រជុំផ្សព្វផ្សាយ ស្តីពីវិធានការពង្រឹងការអនុវត្តច្បាប់ ស្តីពីចរាចរណ៍ផ្លូវគោក របស់អគ្គស្នងការនគរបាលជាតិ
ខេត្តមណ្ឌលគិរី៖ដើម្បីអនុវត្តឲ្យបាននូវការរិតបន្តឹងការអនុវត្តន៍ច្បាប់ចរាចរណ៍ផ្លូវគោកតាមអនុក្រឹត្យលេខ ៣៩ របស់រាជរដ្ឋាភិបាល ឲ្យកាន់តែមានប្រសិទ្ធភាពបន្ថែមទៀត និងដើម្បីកាត់បន្ថយការគ្រោះថ្នាក់ចរាចរណ៍ផ្លូវគោកឲ្យបានជាអតិបរមា នាព្រឹក ថ្ងៃពុធ ៧រោច ខែពិសាខ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១២ ខែឧសភា ឆ្នាំ២០២០ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគីរី បានដឹកនាំកិច្ចប្រជុំផ្សព្វផ្សាយអនុសាសន៍ណែនាំដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ក្នុងកិច្ចប្រជុំកាលពីថ្ងៃទី១១ ខែឧសភា ឆ្នាំ២០២០ ស្តីពីវិធានការពង្រឹងការអនុវត្តច្បាប់ស្តីពីចរាចរណ៍ផ្លូវគោក។
សមាភាពអញ្ជើញចូលរួមក្នុងកិច្ចប្រជុំរួមមានលោក លោកស្រីស្នងការរង នាយ នាយរងការិយាល័យ នាយ នាយរងផ្នែក ការិយាល័យចរាចរណ៍ផ្លូវគោក និងការិយាល័យជំនាញពាក់ព័ន្ធ លោក អធិការ អធិការរងនគរបាល ក្រុង/ស្រុក ទាំង០៥ និងលោកមេបញ្ជាការ មេបញ្ជាការរង វរសេនាតូចទាំងពីរផងដែរ។
ក្នុងការពង្រឹងករណីល្មើសនឹងច្បាប់ស្តីពីចរាចរណ៍ផ្លូវគោកមាន០៧ចំណុច ចំពោះទោចក្រយានយន្ត ត្រីចក្រយានយន្ត ត្រីចក្រយានយន្តសណ្តោងរ៉ឺម៉ក និងម៉ូតូកង់បួន និងចំពោះយានយន្តធុនស្រាល យានយន្តធុនធ្ងន់ មាន០៩ចំណុច ផងដែរ។
ក្នុងកិច្ចប្រជុំនេះដែរលោកឧត្តមសេនីយ៍ ស្នងការ ក៏បានកោតសរសើរ និងវាយតម្លៃខ្ពស់ចំពោះមន្រ្តីនគរបាលអនុវត្តច្បាប់ចរាចរណ៍ ក្នុងការចុះរឹតបន្តឹងអនុវត្តច្បាប់ចរាចរណ៍ក្នុងខេត្តមណ្ឌលគិរី តាមអនុក្រឹត្យលេខ ៣៩ថ្មីនេះកន្លងមកឃើញថា ប្រជាពលរដ្ឋភាគច្រើនពួកគាត់បានចូលរួមគោរពច្បាប់ចរាចរណ៍ទាំងអស់គ្នា ជាពិសេសបទល្មើស និងករណីគ្រោះថ្នាក់ចរាចរណ៍មានការថយចុះគួរឲ្យកត់សម្គាល់ និងជាទីមោទនៈ៕
