កម្លាំងកងរាជអាវុធហត្ថ ក្រុងសេរីសុភ័ណ្ឌ ឃាត់ខ្លួនជនសង្ស័យ ៤ នាក់បន្ទាប់ពីធ្វើសកម្មភាព..
ខេត្តបន្ទាយមានជ័យ៖ ដោយមានការយកចិត្តទុកដាក់ពីលោកឧត្ដមសេនីយ៍ត្រី បោន ប៊ិន មេបញ្ជាការ អ.ហ. ខេត្ត ដើម្បីការពារសន្តិសុខសណ្ដាប់ធ្នាប់ជូនពលរដ្ឋ កម្លាំងមូលដ្ឋាន អ.ហ.ក្រុងសិរីសោភ័ណ ដឹកនាំដោយលោក វ/ត្រី យ៉ាន់ សុវណ្ណ មេ/ការ មូលដ្ឋាន អ.ហ ក្រុង បានចុះល្បាតរក្សាសន្តិសុខ សណ្ដាប់ធ្នាប់ ក្នុងភូមិសាស្ត្រក្រុងរហូតដល់វេលាម៉ោង២០និង៣០នាទី ពេលទៅដល់ចំណុចស្ពានថ្មទី២ លើកំណាត់ផ្លូវជាតិលេខ៦ ស្ថិតក្នុងភូមិ/សង្កាត់កំពង់ស្វាយ ក្រុងសិរីសោភ័ណ ខេត្ត ប/ជ បានប្រទះឃើញយុវជន០២នាក់កំពុងធ្វើសកម្មភាពប្រើប្រាស់គ្រឿងញៀន ភ្លាមៗនោះកម្លាំង អ.ហ បានធ្វើការការឃាត់ខ្លួនព្រមទាំងដកហូតសម្ភារ:វត្ថុតាងមួយចំនួន។
ហើយធ្វើការសាកសួរបឋមទើបទទួលបានតម្រុយបន្ថែម ហើយកម្លាំងបានបន្តធ្វើប្រតិបត្តិការរហូតឈានដល់ការឃាត់ខ្លួនបានជនសង្ស័យចំនួន០២នាក់បន្ថែមទៀត នៅចំណុចផ្ទះសំណាក់សារ៉ាត់ថង ស្ថិតក្នុងភូមិ/សង្កាត់កំពង់ស្វាយ ក្រុងសិរីសោភ័ណ ប/ជ ព្រមទាំងដកហូតគ្រឿងញៀនមេតំហ្វេតាមីនទឹកកកចំនួន០៥កូនថង់តូច ស្មើនឹងទម្ងន់១,៥១ក្រាម ម៉ូតូចំនួន០២គ្រឿង ទូរស័ព្ទដៃចំនួន០៣គ្រឿង និងសម្ភារ:សម្រាប់ប្រើប្រាស់គ្រឿងញៀនមួយចំនួន។ ប្រតិបត្តិការនេះធ្វើឡើងនៅយប់ថ្ងៃទី០៧ ខែឧសភា ឆ្នាំ ២០២០។
លោក វ/ត្រី យ៉ាន់ សុវណ្ណ បានប្រាប់ឱ្យដឹងថា ជនសង្ស័យទាំង០៤នាក់ ១/.ឈ្មោះ ស៊ុយ គឹមសៀន ភេទប្រុស អាយុ១៨ឆ្នាំ រស់នៅភូមិ/សង្កាត់ កំពង់ស្វាយ ក្រុងសិរីសោភ័ណ ២/.ឈ្មោះ វង្ស កក្កដា ភេទប្រុស អាយុ១៩ឆ្នាំ រស់នៅភូមិព្រៃឬស្សី សង្កាត់ព្រះពន្លា ក្រុងសិរីសោភ័ណ ៣/. ឈ្មោះ ឃុល ខឿយ ភេទប្រុស អាយុ៣០ឆ្នាំ រស់នៅភូមិតាទង់ សង្កាត់ព្រះពន្លា ក្រុងសិរីសោភ័ណ ៤/. ឈ្មោះ ហេង តុលា ភេទប្រុស អាយុ១៥ឆ្នាំ រស់នៅភូមិ/សង្កាត់ ព្រះពន្លា ក្រុងសិរីសោភ័ណ ខេត្ត ប/ជ ។
លោក វ/ត្រី យ៉ាន់ សុវណ្ណ បានឱ្យដឹងទៀតថា ក្រោយពីកម្លាំងជំនាញសាកសួរចម្លើយ ពួកគេបានឆ្លើយសារភាពថា ពួកគេបានទិញគ្រឿងញៀនយកមករក្សាទុកសម្រាប់ចែកចាយផង និងសម្រាប់ប្រើប្រាស់ខ្លួនឯងផង។
ក្រោយពីជនសង្ស័យបានចម្លើយសារភាព និងមានវត្ថុតាងផងនោះ កម្លាំងជំនាញ អ.ហ ក្រុង បានបញ្ជូនសំណុំរឿងជនសង្ស័យមកទីបញ្ជាការដ្ឋាន អ.ហ.ខេត្តដើម្បីចាត់ការបន្ត។ បច្ចុប្បន្ន៖ ជនសង្ស័យទាំង០៤នាក់ និងវត្ថុតាង ត្រូវបានកម្លាំងការិយាល័យបទល្មើសគ្រឿងញៀនបញ្ជូនទៅសាលាដំបូងខេត្តចាត់ការតាមនីតិវិធី៕
