ពលរដ្ឋចំនួន៣នាក់ ដែលកំពុងដាក់ខ្លួនឲ្យនៅដាច់ដោយឡែករយៈពេល១៤ថ្ងៃ នៅស្រុករមាសហែក ទទួលអំណោយពីសាខាកាកបាទក្រហមកម្ពុជា ខេត្តស្វាយរៀង
ខេត្តស្វាយរៀង៖នាព្រឹកថ្ងៃសុក្រ ៣រោច ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនិងថ្ងៃទី១០ ខែមេសា ឆ្នាំ២០២០នេះ ឯកឧត្តម ម៉ែន វិបុល អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តស្វាយរៀង ព្រមទាំងសមាជិក សមាជិកានៃគណៈកម្មាធិការសាខា អនុសាខា បាននាំយកនូវអំណោយមនុស្សធម៌ របស់សាខា ចុះសួរសុខទុក្ខដល់បងប្អូនប្រជាពលរដ្ឋចំណាកស្រុកចំនួន៣នាក់ ដែលទើបត្រឡប់មកពីប្រទេសថៃ និងកូរ៉េ និងកំពុងដាក់ខ្លួនឲ្យនៅដាច់ដោយឡែកដោយខ្លួនឯងរយៈពេល១៤ថ្ងៃ នៅស្រុករមាសហែក។
ក្នុងឱកាសនោះ ឯកឧត្តមបានពាំនាំនូវប្រសាសន៍ផ្តាំផ្ញើ និងសេចក្ដីនឹករលឹកពីសំណាក់សម្តេចតេជោ និងសម្ដេចកិត្ដិព្រឹទ្ធបណ្ឌិតប្រធានកាកបាទក្រហមកម្ពុជា ដែលជានិច្ចកាលសម្តេចទាំងទ្វេតែងតែយកចិត្តទុកដាក់ ជួយដល់ប្រជាពលរដ្ឋគ្រប់ពេលវេលា។
ទន្លឹមនេះ ឯកឧត្តមអភិបាលខេត្តក៏បានថ្លែងនូវការអរគុណចំពោះពលករដែលមកពីចំណាកស្រុក ហើយស្ម័គ្រចិត្តដាក់ខ្លួនឯងឲ្យនៅដាច់ដោយឡែករយៈពេល១៤ថ្ងៃ ដើម្បីតាមដានសុខភាពថា មាន ឬគ្មានជំងឺកូវីដ១៩ និងសូមឲ្យបងប្អូនពលករត្រូវធ្វើអនាម័យខ្លួនប្រាណឲ្យបានជាប្រចាំ ប្រសិនបើមានអាការៈមិនស្រួល ដូចជាក្អក ពិបាកដកដង្ហើម ឬមានបញ្ហាផ្សេងទៀតត្រូវរាយការណ៍ជូនអាជ្ញាធរមូលដ្ឋាន ដើម្បីជូនទៅជួបគ្រូពេទ្យដែលនៅជិតបំផុត ហើយឯកឧត្តមក៏បានសំណូមពរដល់ប្រជាពលរដ្ឋ ដែលបានដាក់ខ្លួនឲ្យនៅដាច់ដោយឡែកនាពេលនេះ ត្រូវអត់ធ្មត់ក្នុងការរស់នៅរហូតគ្រប់១៤ថ្ងៃ ព្រោះក្នុងកាលៈទេសៈនេះ គឺជាការចូលរួមចំណែករបស់បងប្អូន ក្នុងការទប់ស្កាត់ការរីករាលដាលនៃជំងឺកូវីដ១៩ ទៅកាន់ក្រុមគ្រួសារ និងអ្នកដ៏ទៃផ្សេងទៀតផងដែរ។
អំណោយដែលត្រូវផ្ដល់ជូនបងប្អូនពលករទាំង៣នាក់ក្នុងម្នាក់ៗទទួលបាន អង្ករ២៥ គ.ក្រ ,មី ១ កេស ,ទឹកស៊ីអ៊ីវ ៦ដប ,ត្រីខ១០កំប៉ុង ,ក្រម៉ា១ ,សាប៊ូ ១ដុំ ,ជែលលាងសម្អាតដៃ ១ដប និងថវិកាចំនួន៥០.០០០រៀល៕
