អភិបាលខេត្តសៀមរាប ចុះពិនិត្យការរុះរើសំណង់ ប៉ះពាល់ការដ្ឋានសាងសង់ ពង្រីកផ្លូវ
ខេត្តសៀមរាប៖ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប កោតសរសើរដល់ប្រជាពលរដ្ឋ២គ្រួសារមានឈ្មោះ ទៀវ សុខវី និងឈ្មោះ ម៉ៅ សុខលី ស្ថិតនៅភូមិស្ទឹងថ្មី តាមបណ្តោយផ្លូវពីកេសរកូល ទៅប្រសព្វនឹងផ្លូវសម្តេចទេពវង្ស( ផ្លូវផ្សារញ៉ែ ទៅស្តុបឡាប៉េ ទល់មុខផ្សារទំនើបចៅសាំងហុក) សង្កាត់ស្វាយដង្គំ ក្រុងសៀមរាប ដែលបានយល់ព្រមឲ្យក្រុមការងារចម្រុះរដ្ឋបាលខេត្ត រុះរើផ្ទះ និងសំយ៉ាបផ្ទះដែលប៉ះពាល់ដីចំណីផ្លូវដោយស្ម័គ្រចិត្ត ដែល រដ្ឋបាលខេត្តសៀមរាបបាន និងកំពុងដំណើរការអនុវត្តគម្រោងសាងសង់ផ្លូវភូមិស្ទឹងថ្មី សង្កាត់ស្វាយដង្គំ ដោយមានការពង្រីកផ្លូវតាមទំហំដែលបានកំណត់ដោយ គណៈកម្មការរដ្ឋបាលខេត្ត។នេះគឺជាសកម្មភាពជាគំរូមួយដែលបានចូលរួមនៅក្នុងសកម្មភាពអភិវឌ្ឍក្រុង។
ក្នុងនាមអាជ្ញាធរខេត្តសៀមរាបសូមស្នើដល់បងប្អូនប្រជាពលរដ្ឋ ទាំងអស់ចូលរួមសហការលើការងារអភិវឌ្ឍន៍នានា នៅក្នុងខេត្តសៀមរាបទាំងមូលផងដែរ។
ឯកឧត្តមមានប្រសាសន៍កោតសើដល់ពលរដ្ឋបែបនេះបានធ្វើឡើង ខណៈដែលឯកឧត្តម អញ្ជើញដឹកនាំក្រុមការងាររដ្ឋបាលខេត្ត ក្រុង សង្កាត់ មេភូមិស្ទឹងថ្មី ចុះទៅពិនិត្យផ្លូវកដប ត្រង់ចំណុចផ្លូវភូមិស្ទឹងថ្មី ប្រសព្វនឹងផ្លូវសម្តេចទេពវង្ស( ផ្លូវផ្សារញ៉ែ ទៅស្តុបឡាប៉េ ទល់មុខផ្សារទំនើបចៅសាំងហុក)
នាថ្ងៃពុធ ៨កើត ខែពិសាខ ឆ្នាំជូត ទោស័ក ព.ស២៥៦៣ត្រូវនឹងថ្ងៃទី២៩ ខែមេសា ឆ្នាំ២០២០ ដើម្បីពិនិត្យមើលផ្ទះ និងសំយ៉ាបផ្ទះដែលប៉ះពាល់លើដីចំណីផ្លូវរបស់ប្រជាពលរដ្ឋចំនួនពីរគ្រួសារដែលបានឯកភាពឲ្យក្រុមការងារចម្រុះរដ្ឋបាលខេត្តរុះរើ ដើម្បីពង្រីកផ្លូវឲ្យបានធំទូលាយ និងងាយស្រួលក្នុងការធ្វើចរាចរណ៍របស់បងប្អូនប្រជាពលរដ្ឋ ដែលរស់នៅក្នុងក្រុងសៀមរាប ក៏ដូចជាការចូលរួមបញ្ជៀសការកកស្ទះចរាចរផងដែរ៕
