សាខាកាកបាទ ក្រហមកម្ពុជាខេត្តកំពង់ធំ នាំយកអំណោយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចែកជូនជនចាស់ជរាជួបការលំបាកចំនួន៤០គ្រួសារ នៅស្រុកសណ្ដាន់
ខេត្តកំពង់ធំ៖ប្រជាពលរដ្ឋខ្វះខាត ចាស់ជរា ជួបការលំបាក រស់នៅក្នុងឃុំមានជ័យ ស្រុកសណ្ដាន់ ខេត្តកំពង់ធំ ចំនួន៤០គ្រួសារ ទទួលអំណោយពីឯកឧត្តម សុខ លូ ប្រធានគណៈកម្មាធិការសាខាកាកបាទ ក្រហមកម្ពុជាខេត្តកំពង់ធំ ដែលជាអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា កាលពីព្រឹកថ្ងៃទី១៧ ខែមេសា ឆ្នាំ២០២០។
អំណោយដែលត្រូវចែកជូននោះក្នុងមួយគ្រួសារៗទទួលបានអង្ករ២៥គីឡូក្រាម,ម៉ុង១,ភួយ១,សារុង១,ក្រមា១,ត្រីខ១យួរ,មី១កេស,សាប៊ូ១ដុំ និងច្រាស១ផងដែរ។
នាឱកាសនោះឯកឧត្តមសុខ លូ ប្រធានគណៈកម្មាធិការសាខាកាកបាទ ក្រហមកម្ពុជាខេត្តកំពង់ធំ បានពាំនាំនូវប្រសាសន៍ផ្ដាំផ្ញើការសាកសួរសុខទុក្ខ និងក្ដីនឹករលឹកពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាល សម្ដេចតែងតែគិតគូរ យកចិត្តទុកដាក់ អំពីសុខទុក្ខប្រជាពលរដ្ឋ និងមិនទុកឱ្យប្រជាពលរដ្ឋរបស់យើង ណាម្នាក់អត់ស្បៀងស្លាប់នោះទេ គឺត្រូវធ្វើយ៉ាងណាជួយ ប្រជាពលរដ្ឋឱ្យទាន់ពេលវេលា ចំពោះប្រជាពលរដ្ឋក្រីក្រ ជនចាស់ជរា ជនពិការភាព ដែលមានទុក្ខលំបាក ជនងាយរងគ្រោះ ជនរងគ្រោះ ដោយគ្រោះមហន្តរាយផ្សេងៗ ដោយមិនប្រកាន់ ពូជសាសន៍ និងនិន្នាការនយោបាយអ្វីឡើយ។
ជាងនេះទៅទៀតឯកឧត្តមសុខ លូ ក៏បានផ្តាំផ្ញើដល់ប្រជាពលរដ្ឋ ត្រូវខិតខំយកចិត្តទុកដាក់ថែរក្សាសុខភាព ប្រកាន់ខ្ជាប់នូវ អនាម័យល្អ ហូបស្អាត ផឹកស្អាត និងរស់នៅស្អាត ដើម្បីជៀសវាង ពីជំងឺនានា ជាពិសេសត្រូវរួមគ្នាទប់ស្កាត់ជំងឺឆ្លងកូវីដ១៩ ដោយអនុវត្តតាមវិធានការ របស់ក្រសួងសុខាភិបាលឲ្យបានត្រឹមត្រូវ៕
