ឯកឧត្តម គង់ សោភ័ណ្ឌ ដឹកនាំកិច្ចប្រជុំបូកសរុបលទ្ធផលការងារ និងលើកទិសដៅអនុវត្តបន្ត ពិសេសការអនុវត្តបទបញ្ជាលេខ០២បប របស់រាជរដ្ឋាភិបាល
ខេត្តកណ្តាល៖ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្ត អញ្ជើញជាអធិបតីក្នុងកិច្ចប្រជុំផ្សព្វផ្សាយពីរបាយការណ៍ និងលិខិតបទដ្ឋានគតិយុត្តិថ្មីៗ របស់រាជរដ្ឋាភិបាល និង ក្រសួងសុខាភិបាល ក្រសួងការងារ និងបណ្តុះបណ្តាលវិជ្ជាជីវៈ ដែលក្រុមការងារខេត្ត និងអាជ្ញាធរពាក់ព័ន្ធបានខិតខំប្រឹងប្រែងអនុវត្តយ៉ាងយកចិត្តទុកដាក់បំផុតកន្លងមក។
កិច្ចប្រជុំនេះបានធ្វើឡើងនាព្រឹកថ្ងៃទី១៧ ខែមេសា ឆ្នាំ២០២០ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ អភិបាលរង ព្រមទាំង លោក លោកស្រី ប្រធានមន្ទីរអង្គភាពជំនាញពាក់ព័ន្ធ ដោយបានធ្វើការ។
នាឱកាសនោះឯកឧត្តម បានស្នើដល់ លោក អភិបាលស្រុក ក្រុង ទាំងអស់ ពិសេសមន្ទីរការងារបណ្ដុះបណ្ដាលវិជ្ជាជីវៈ ត្រូវយកចិត្តទុកខ្ពស់ ចំពោះកម្មករ-កម្មការិនីមួយចំនួនតូច ដែលមិនគោរពតាមបទបញ្ជារបស់រាជរដ្ឋាភិបាល គឺត្រូវចាត់វិធានការចត្តាឡីស័ក រយៈពេល១៤ថ្ងៃ ជាចាំបាច់លើពួកគាត់ពេលដែលពួកគាត់វិលត្រឡប់មកបម្រើការងារវិញ ក្រោយពីបានឈប់សម្រាក និងធ្វើដំណើទៅស្រុកក្នុងឱកាសបុណ្យចូលឆ្នាំខ្មែរប្រពៃណីជាតិខ្មែរកន្លងទៅ។
ការមានវិធានការបែបនេះ គឺយើងបានអនុវត្តតាមខ្លឹមសារណែនាំនៃលិខិតលេខ ០១៣/២០ កប/សជណ.ខល និងលិខិតលេខ០៦៦ សខល របស់ក្រសួងសុខាភិបាល ស្តីពីការចាត់វិធានការចត្តាឡីស័ករយៈពេល១៤ថ្ងៃ លើកម្មករ-កម្មការនី ដែលនឹងវិលត្រឡប់ចូលបម្រើការងារវិញ បន្ទាប់ពីពិធីបុណ្យចូលឆ្នាំថ្មីប្រពៃណីជាតិខ្មែរ ឯកឧត្តមបានស្នើដល់មន្ទីរជំនាញពាក់ព័ន្ធពិសេស មន្ទីរការងារ និងមន្ទីរសុខាភិបាលត្រូវយកចិត្តទុកដាក់ខ្ពស់ក្នុងការត្រួតពិនិត្យតាមដានសុខភាពពួកគាត់ឱ្យបានជាប់ជាប្រចាំ។
ក្នុងនោះឯកឧត្ដមអភិបាល បានថ្លែងអំណរគុណដល់ក្រុមការងាររាជរដ្ឋាភិបាលចុះមូលដ្ឋានខេត្តកណ្ដាល ដែលចូលរួមជួយដោះស្រាយផលប៉ះពាល់ជីវភាព និងសេដ្ឋកិច្ចរបស់ប្រជាពលរដែលមានជីវភាពក្រីក្រ គឺក្រុមការងារបានចុះដល់លំនៅឋានតែម្តង ព្រមទាំងបានកោតសរសើរចំពោះលទ្ធផលការងារ របស់គណៈកម្មការខេត្ត និងអាជ្ញាធរមូលដ្ឋាន ក្នុងយុទ្ធនាការដ៏ក្តៅគគុកនេះ គឺមានន័យថាយើងបាននាំគ្នាសហការក្នុងការទប់ស្កាត់បានទាន់ពេលវេលា ដោយបានចុះអប់រំណែនាំដល់បងប្អូនប្រជាពលរដ្ឋដល់ខ្នងផ្ទះ មានការផ្សព្វផ្សាយតាមឧបករណ៍សម្លេងនៅតាមគោលដៅសំខាន់ៗ និងការចែកចាយខិតបណ្ណផងដែរ។
ឯកឧត្ដបានមបន្តទៀតថា ក្នុងខេត្តកណ្តាលមានអ្នកឆ្លងជំងឺកូវីដ-១៩ តែ០២នាក់ប៉ុន្នោះ ដោយមានការយកចិត្តទុកដាក់ពីក្រុមការងារខេត្ត និងក្រុមគ្រូពេទ្យជំនាញ បានព្យាបាល ពួកគាត់ទាំង២នាក់ រហូតបានជាសះស្បើយព្រមទាំងបានវិលត្រលប់ទៅរស់នៅជួបជុំក្រុមគ្រួសារវិញ ចំណែកឯប្រជាពលរដ្ឋដែលធ្លាប់មានទំនាក់ទំនងជិតស្និទ្ធ និងអ្នកជំងឺកូវីដ-១៩ នេះ ក្រុមគ្រូពេទ្យបានដាក់ពួកគាត់ឱ្យនៅដាច់ដោយឡែករយៈពេល១៤ថ្ងៃ និងបន្តតាមដានជាប់ជាប្រចាំ រហូតមកដល់ពេលនេះ ជាលទ្ធផលពួកគាត់មិនបានឆ្លងបន្តឡើយ៕
