ឧបទ្ទវហេតុគ្រោះថ្នាក់ចរាចរណ៍ នៅព្រះសីហនុ រវាងរថយន្តបុកម៉ូតូ បណ្តាលឱ្យ២នាក់ប្ដីប្រពន្ធ ស្លាប់យ៉ាងអាណោចអធម
ខេត្តព្រះសីហនុ៖ពិតជារន្ធត់ណាស់ករណីគ្រោះថ្នាក់ចរាចរណ៍រវាងរថយន្តបុកម៉ូតូ នៅព្រះសីហនុ បណ្តាលឱ្យ២នាក់ប្ដីប្រពន្ធ ស្លាប់យ៉ាងអាណោចអធម។
ករណីនេះបានកើតឡើងកាលពី ថ្ងៃទី៨ ខែមីនា ឆ្នាំ២០២០ ស្ថិតចន្លោះគីឡូម៉ែត្រលេខ១៩២-១៩៣ ភូមិបត់សិរមាន់ ឃុំព្រៃនប់ ស្រុកព្រៃនប់ ខេត្តព្រះសីហនុ។
បើតាមសមត្ថកិច្ចបានឱ្យដឹងថា មុនពេលកើតហេតុមានម៉ូតូមួយគ្រឿងម៉ាក HONDA-WAVE ពណ៌ខ្មៅ គ្មានពាក់ផ្លាកលេខ ធ្វើដំណើរពីភ្នំពេញ ទៅព្រះសីហនុ លុះមកដល់ចំណុចខាងលើ បានបើកជ្រុលចូលមកចំណែកផ្លូវម្ខាងឆ្វេងដៃរបស់ខ្លួន ក៏ត្រូវរថយន្តធំដឹកដែក០១គ្រឿងពាក់ផ្លាកលេខ ភ្នំពេញ 3C-0194 បុកប៉ះចំពីមុខធ្លាក់មកដល់ដីក្រហម ក្នុងទិសដៅផ្ទុយគ្នា បណ្ដាលឲ្យអ្នកបើកបរម៉ូតូ ២នាក់ប្ដីប្រពន្ធស្លាប់ភ្លាមៗនៅនឹងកន្លែងកើតហេតុ។
ក្រោយពីកើតហេតុកម្លាំងសមត្ថកិច្ច ចុះដល់ទីតាំងវាស់វែង យកវត្ថុតាងទៅរក្សាទុក នៅអធិការដ្ឋាននគរបាលស្រុក ដើម្បីរង់ចាំដោះស្រាយតាមនីតិវិធី ចំណែកសព រក្សាទុកចាំក្រុមគ្រួសារ ទៅយកមកធ្វើបុណ្យតាមប្រពៃណី៕
