បែកធ្លាយសាលាឧទ្ធរណ៍ លួចដោះលែងម្ចាស់ទីតាំងលក់ស្រាក្លែងក្លាយ នៅក្រុងប៉ោយប៉ែត ដែលមិនទាន់កាត់ទោស
ខេត្តបន្ទាយមានជ័យ៖តើពិតឬយ៉ាងណា ? ដោយយោងតាមប្រភពមួយបានបង្ហើបឲ្យសារព័ត៌មានយើង ដឹងថា ម្ចាស់ទីតាំងលក់ស្រាក្លែងក្លាយដុះស្លែរម្នាក់ ឈ្មោះ ថៃ ម៉ាឡា (ហៅ តុលា ) ត្រូវបានសាលាឧទ្ធរណ៍លួចធ្វើការដោះលែង អោយមានសេរីភាព បន្ទាប់ពីត្រូវបានកម្លាំងនគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ សហការជាមួយកម្លាំងនគរបាលខេត្តបន្ទាយមានជ័យ និងមានការចូលរួមពីអាជ្ញាធរពាក់ព័ន្ធក្នុងក្រុងប៉ោយប៉ែត ធ្វើការឃាត់ខ្លួនជនសង្ស័យខាងលើ បាន មួយរយៈខ្លី បន្ទាប់ពីតុលាការខេត្តបន្ទាយមានជ័យ បញ្ជួនសំណុំរឿង និងជនសង្ស័យទៅសាលាឧទ្ធរណ៍។
តាមប្រភពបានបញ្ជាក់ថា កាលពីរសៀលថ្ងៃទី២៧ ខែវិច្ឆិកា ឆ្នាំ២០១៩ កម្លាំងនគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ ដឹកនាំដោយលោកឧត្តមសេនីយ៍ទោ ឡុង ស្រេង សហការជាមួយកម្លាំងនគរបាលខេត្តបន្ទាយមានជ័យ ចុះធ្វើការឆែកឆេរ និងឃាត់ខ្លួនបានម្ចាស់ទីតាំងលក់ស្រាក្លែងក្លាយម្នាក់ឈ្មោះ ថៃ ម៉ាឡា ហៅ តុលា និងបានរកឃើញស្រាក្លែងក្លាយជាច្រើនម៉ាក ច្រើនយីហោ ព្រមទាំង រកឃើញសុទ្ធតែឯកសារក្លែងក្លាយមួយចំនួនធំផងដែរ ។
ប្រភពបន្តថា ក្រោយពីឃាត់ខ្លួនជនសង្ស័យឈ្មោះ ថៃ ម៉ាឡា ហៅ តុលា រួមជាមួយឯកសារ និង ស្រាក្លែងក្លាយ នគរបាលជំនាញបានដឹកជញ្ជួនវត្ថុតាង យកទៅរក្សាទុកបណ្តោះអាសន្ននៅ ស្នងការនគរបាលខេត្តបន្ទាយមានជ័យ ចំនែកឯជនសង្ស័យ ត្រូវបានយកទៅឃុំខ្លួនបណ្តោះអាសន្នរងចាំចាត់ការតាមនីតិវិធីបន្តទៀត។ហើយក្រោយមកទៀត តុលាខេត្តបន្ទាយមានជ័យ បានបញ្ជួនសំណុំរឿងមួយនេះទៅសាលាឧទ្ធរណ៍ ចាត់ការបន្តតាមនីតិវិធី។
ប្រភពបន្តថា សមត្ថកិច្ចជំនាញ ទម្រាំតែស៊ើបអង្កេត និង រកវត្ថុដែលពាក់ព័ន្ធ និងឃាត់ជនសង្ស័យខាងលើ បានត្រូវចំណាយពេលជិតកន្លះឆ្នាំ។ហើយក្នុងនោះផងដែរប្រភពបន្ថែមថា សមត្ថកិច្ចជំនាញមួយចំនួន គឺពិតជាមានការខកចិត្តយ៉ាងខ្លាំងចំពោះ អ្នកដែលកាន់សំណុំរឿងមួយនេះដែលនៅសាលាឧទ្ធរណ៍ លួចឃុបឃិតគ្នាធ្វើការដោះលែងជនសង្ស័យ ។
ប្រភពបន្តទៀតថា តើមានយល់ពីអារម្មណ៍សមត្ថកិច្ចដែរឬក៏អត់ថាៈមុនស៊ើបអង្កេត និង ស្វែងរកវត្ថុពាក់ព័ន្ធការលក់ដូរ និងការចែកចាយស្រាក្លែង នៅក្រុងប៉ោយប៉ែតនេះ ត្រូវចំនាយកម្លាំង ថវិការ និង ពេលវេលា យូរប៉ុនណា ទើបអាចបំបែកសំណុំរឿងមួយនេះបានជោគជ័យ ហេតុអី ក៏អ្នកច្បាប់ដោះលែងងាយៗម្លេះ?។
ដោយយោងតាមប្រភពដូចខាងលើ តើករណីមួយនេះពិតរឺយ៉ាងណា? សូមស្ថាប័នពាក់ព័ន្ធជួយធ្វើការបកស្រាយផង ?៕ដោយអង្គភាព: រស្មីជាយដែន ទំនាក់ទំនងផ្តល់់ព័ត៌មាន: 012529099/088 4450068
