ឧបទ្ទវហេតុគ្រោះថ្នាក់ចរាចរណ៍ បង្កឡើងដោយបុរសម្នាក់ស្រវឹងស្រា បើករថយន្តជ្រុលទៅបុកម៉ូតូកង់បី១គ្រឿង បណ្តាលឱ្យខូចខាត និងរបួសធ្ងន់ម្នាក់
រាជធានីភ្នំពេញ៖បុរសម្នាក់បើកបររថយន្តស៊េរីទំនើបម៉ាកអូឌី ក្នុងស្ថានភាពស្រវឹងជោគជាំ បោះពួយយ៉ាងលឿន ជ្រុលទៅបុកម៉ូតូកង់បី១គ្រឿងដាច់ជាពីរកំណាត់ បណ្តាលអោយខូចខាត និងរបួសធ្ងន់ម្នាក់ ដឹកយកទៅសង្គ្រោះនៅឯមន្ទីរពេទ្យ។
ករណីនេះបានកើតឡើងកាលពីវេលាម៉ោងជាង១១យប់ថ្ងៃទី១៩ ខែមីនា ឆ្នាំ២០២០ ត្រង់ចំណុចផ្សារដើមអំពិល តាមបណ្ដោយផ្លូវឧកញ៉ាម៉ុង រិទ្ធី កែងនិងផ្លូវបេតុង ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
បើតាមប្រភពព័ត៌មានបានឱ្យដឹងថា នៅមុនកើតហេតុ គេឃើញបុរសម្នាក់ជិះម៉ូតូកង់បី១គ្រឿង ពាក់ផ្លាកលេខ ភ្នំពេញ 1M-2535 ធ្វើដំណើរពីជើងទៅត្បូងតាមផ្លូវបេតុង លុះមកដល់ចំណុចកើតហេតុ ម៉ូតូកង់បីបានបើកឆ្លងផ្លូវឧកញ៉ា ម៉ុង រិទ្ធី ក្នុងគោលបំណង់បត់ឆ្វេងឆ្ពោះទៅអតីតរង្វង់មូលកាំខូស៊ីតធី ស្របពេលនោះ ស្រាប់តែមានរថយន្តស៊េរីទំនើប១គ្រឿង ម៉ាកអូឌី ពណ៌ស ពាក់ផ្លាកលេខ ភ្នំពេញ 2BD-2211 បើកបរដោយបុរសម្នាក់ ក្នុងស្ថានភាពស្រវឹង តាមបណ្ដោយផ្លូវឧកញ៉ា ម៉ុង រិទ្ធី ក្នុងទិសដៅពីកើតទៅលិចក្នុងល្បឿយ៉ាងលឿនមិនប្រយ័ត្ន ក៏ជ្រុលទៅបុកម៉ូតូកង់បីខាងលើពេញទំហឹង បណ្ដាលឲ្យខ្ទាតម៉ូតូដាច់ចេញពីរម៉កសណ្តោងលោតទៅផ្លូវម្ខាងទៀត រងការខូចខាតស្ទើរទាំងស្រុង ចំណែកបុរសជាអ្នកបើកម៉ូតូកង់បី បានរងរបួសធ្ងន់។
ដោយទ្បែករថយន្តបង្កបានបន្តបុកអូសរ៉ឺម៉កសណ្តោងឡើងទៅលើខឿនផ្ទះប្រជាពលរដ្ឋ ចម្ងាយប្រមាណ៥ម៉ែត្រ រងការខូចខាតផ្នែកខាងមុខយ៉ាងដំណំ។មួយសន្ទុះក៏មានរថយន្តសង្គ្រោះបន្ទាន់ បានមកដឹកជនរងគ្រោះទៅមន្ទីពេទ្យកាល់ម៉ែតភ្លាមៗផងដែរ។
ក្រោយកើតហេតុបន្ទាប់ពីសមត្ថកិច្ចជំនាញ ចុះមកធ្វើការវាស់វែងរួច ក៏បាននាំយកមធ្យោបាយទាំងពីទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយតាមនីតិវិធីជាក្រោយ៕
