កិច្ចប្រជុំស្តីពីការបង្កើតគណៈកម្មការប្រយុទ្ធ នឹងជំងឺកូវីដ១៩(COVID-19)
ខេត្តស្ទឹងត្រែង៖ឯកឧត្តម ម៉ុម សារឿន អភិបាលនៃគណៈអភិបាលខេត្តស្ទឹងត្រែង បានជំរុញដល់មន្ទីរអង្គភាព ដែលពាក់ព័ន្ធ ពិសេសមន្ទីរសុខាភិបាល ដែលជាសេនាធិការឲ្យរដ្ឋបាលខេត្ត ត្រូវធ្វើយ៉ាងណាដាក់ចេញនូវទិសដៅ ដោយបន្តលើកកម្ពស់អនុវត្តយ៉ាងសកម្មតាមការណែនាំរបស់រាជរដ្ឋាភិបាល ដើម្បីបង្ការទប់ស្កាត់ប្រឆាំង នឹងការរីករាលដាលនៃវីរុសប្រភេទថ្មីកូរ៉ូណា ឬ កូវីដ១៩(COVID-19) ដែលកំពុងកើតមានជាសកល ដោយធ្វើការយកចិត្តទុកដាក់ អប់រំ ផ្សព្វផ្សាយ ណែនាំ ដល់ប្រជាពលរដ្ឋនៅតាមបណ្តាមូលដ្ឋានក្រុង ស្រុក ក្នុងទូទាំងខេត្ត អំពីវិធានការនានាក្នុងការបង្ការ និងទប់ស្កាត់ការឆ្លងមេរោគ(COVID-19) ឲ្យទាន់ពេលវេលា។
ឯកឧត្តមអភិបាលខេត្ត ជំរុញដល់មន្ទីរអង្គភាព ដែលពាក់ព័ន្ធ ពិសេសមន្ទីរសុខាភិបាល បានធ្វើឡើងក្នុងឱកាសដែលឯកឧត្តមដឹកនាំកិច្ចប្រជុំគណៈកម្មការប្រយុទ្ធនឹងជំងឺកូវីដ១៩(COVID-19)នាព្រឹកថ្ងៃព្រហស្បតិ៍ ១១រោច ខែផល្គុន ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៩ ខែមីនា ឆ្នាំ២០២០ នៅសាលប្រជុំសាលាខេត្ត។
ក្នុងឱកាសនោះក៏មានការអញ្ជើញចូលរួមពីសំណាក់ថ្នាក់ដឹកនាំខេត្ត កម្លាំងប្រដាប់អាវុធ មន្ទីរអង្គភាពជុំវិញខេត្ត នាយក នាយករងរដ្ឋបាលសាលាខេត្ត ទីចាត់ការចំណុះសាលាខេត្ត និងមន្រ្តីរាជការពាក់ព័ន្ធជាច្រើនរូបទៀតផងដែរ៕
