ឃាត់ខ្លួនជនសង្ស័យ១នាក់ ពាក់ពន្ធ័ករណីគ្រឿងញៀន
បន្ទាយមានជ័យ៖កាលពីវេលាម៉ោង០២និង៣០នាទីយប់ ថ្ងៃទី១៨ ខែមិនា ឆ្នាំ២០២០ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធក្រុង បានចុះល្បាតការពារសន្តិសុខ សណ្ដាប់ធ្នាប់ រក្សាសុវត្ថិភាពក្នុងភូមិសាស្រ្តក្រុងប៉ោយប៉ែត លុះដល់ចំណុចកាស៊ីណូផ្កាយ៥ ម្ដុំមាត់អូរ បានប្រទះឃើញមនុស្ស១ក្រុមកំពុងប្រមូលផ្ដុំគ្នាក្នុងសកម្មភាពគួរឱ្យសង្ស័យ កម្លាំងសមត្ថកិច្ចក៏បានធ្វើការសួរនាំ ស្រាប់តែក្រុមមនុស្សទាំងនោះបានរត់គេចខ្លួនអស់តែម្ដង បន្សល់ទុកនូវវត្ថុតាងមួយចំនួននៅកន្លែងកើតហេតុ។
លុះក្រោយមកមានជនសង្ស័យម្នាក់ បានត្រឡប់មកសួរសន្តិសុខយាមនៅកាស៊ីណូអំពីសម្ភារ:របស់ខ្លួនដែលបន្សល់ទុកចោលនៅកន្លែងកើតហេតុ ពេលនោះសន្តិសុខកាស៊ីណូបានរាយការណ៍មកសមត្ថកិច្ច ភ្លាមៗនោះកម្លាំងក៏បានបានធ្វើប្រតិបត្តិការឃាត់ខ្លួនជនសង្ស័យបានតែម្ដង នៅចំណុចភូមិក្បាលស្ពាន១ សង្កាត់/ក្រុងប៉ោយប៉ែត ខេត្តបន្ទាយមានជ័យ និងដកហូតបានគ្រឿងញៀនម្សៅក្រាមពណ៍សថ្លា ចំនួន០៤កញ្ចប់ ស្មើ ១,៦ក្រាម និងកាំបិតចំនួន០៤ដើម ហើយបញ្ជូនមកបញ្ជាការមូលដ្ឋាន អ.ហ ក្រុង ដើម្បីសាកសួរ។
លោកវរសេនីយ៍ត្រី នួន នីណារ៉ូ បានឱ្យដឹងថា ជនសង្ស័យឈ្មោះ សុខ ប៊ុនធឿន ភេទប្រុស អាយុ២៥ឆ្នាំ រស់នៅភូមិក្បាលកោះ សង្កាត់/ក្រុងប៉ោយប៉ែត ខេត្តបន្ទាយមានជ័យ។ជនសង្ស័យក្រោយពីធ្វើការសាកសួរ បានឆ្លើយសារភាពថា ខ្លួនពិតជាបានរក្សាទុកនូវសាធាតុញៀនដើម្បីចែកចាយពិតប្រាកដមែន។
ជនសង្ស័យត្រូវបានកម្លាំងអាវុហត្ថក្រុងប៉ោយប៉ែតបញ្ជូនមកបញ្ជាការដ្ឋានកងរាជអាវុធហត្ថខេត្តចាត់ការបន្ត។ជនសង្ស័យពេលបញ្ជូនមកដល់បញ្ជាការដ្ឋានកងរាជអាវុធហត្ថខេត្ត ត្រូវបានកម្លាំងការិយាល័យជំនាញបទល្មើសគ្រឿងញៀនកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី៕
