នាំគ្នាទៅលេងទឹករណ្តៅដី ខាងក្រោយភូមិ លង់ស្លាប់ យ៉ាងអាណោចអធម
រាជធានីភ្នំពេញ៖ក្មេងប្រុស២នាក់បងប្អូនជីដូនមួយ បាននាំគ្នាទៅលេងទឹករណ្តៅដីខាងក្រោយភូមិ បណ្តាលឱ្យលង់ស្លាប់ទាំង២នាក់ កាលពីវេលាម៉ោង១និង៣០នាទីរសៀល ថ្ងៃទី១៦ ខែមីនា ឆ្នាំ២០២០ នៅចំណុចរណ្តៅដីមានទឹកមួយកន្លែងខាងកើត ភូមិសំរោងកណ្តាល សង្កាត់សំរោង ខណ្ឌព្រែកព្នៅ រាជធានីភ្នំពេញ។
សពក្មេងប្រុសទាំង២នាក់ទី១-ឈ្មោះ ឆេង ភានិត អាយុ៧ឆ្នាំ មានឪពុកឈ្មោះ មឿង ឆេង អាយុ៣៥ឆ្នាំ មុខរបរកម្មករ និងម្តាយឈ្មោះឡូញ សារិន អាយុ៣៦ឆ្នាំ មុខរបរកម្មការិនី។
ទី២ឈ្មោះ ស៊ុយ ប៊ុនថេង អាយុ៦ឆ្នាំ មានឪពុកឈ្មោះ សាំង វុទ្ធីអាយុ៣៣ឆ្នាំ មុខរបរកម្មករ និងម្តាយឈ្មោះ មឿង សុខគា អាយុ៣៧ឆ្នាំ មុខរបរកម្មការិនី។អ្នកទាំងអស់គ្នាស្នាក់នៅភូមិសំរោងកណ្តាល សង្កាត់សំរោង ខណ្ឌព្រែកព្នៅ រាជធានីភ្នំពេញ។
បើតាមប្រភពព័ត៌មានបានឱ្យដឹងថា នៅមុនពេលកើតហេតុស្ត្រីជាម្តាយក្មេងរងគ្រោះឈ្មោះ ឆេង ភានិត បានបាត់កូន និងក្មួយក៏ឆោឡោប្រាប់បងប្អូនសាច់ញាតិឱ្យជួយរក ហើយក្រុមសាច់ញាតិក៏ចេញដើររកក្មេងទាំងពីរនាក់នោះ លុះមកដល់រណ្តៅដីមួយកន្លែងនៅខាងកើតភូមិ ក៏ប្រទះឃើញខោអាវ និងស្បែកជើងពីរគូរបស់ក្មេងទាំងពីរ មានការសង្ស័យក៏ចុះរាវរកក៏ប្រទះឃើញ។
បច្ចុប្បន្នក្មេងរងគ្រោះទាំង២នាក់ ត្រូវបានឪពុកម្តាយនាំយកទៅធ្វើបុណ្យតាមប្រពៃណី៕