ជនសង្ស័យម្នាក់ ត្រូវបានអាវុធហត្ថខេត្តបន្ទាយមានជ័យ បញ្ជូនទៅតុលាការខេត្ត ពាក់ព័ន្ធទៅនឹងករណីជួញដូរគ្រឿងញៀន
ខេត្តបន្ទាយមានជ័យ៖ជនសង្ស័យម្នាក់ដែលជាប់ពាក់ព័ន្ធទៅនឹងករណីជួញដូរគ្រឿងញៀនខុសច្បាប់ ត្រូវបានកម្លាំងកងរាជអាវុធហត្ថ ស្រុកស្វាយចេក ដឹកនាំដោយលោកវរសេនីយ៍ទោ ជ័យ សុកា មេបញ្ជាការ មូលដ្ឋានអាវុធហត្ថស្រុកស្វាយចេក បានធ្វើការឃាត់ខ្លួន នៅវេលាម៉ោង០៨ និង២០នាទី ថ្ងៃទី២៤ ខែធ្នូ ឆ្នាំ២០២០ នៅចំណុចខាងកើតភូមិបែកចាន ឃុំស្វាយចេក ស្រុកស្វាយចេក ខេត្តបន្ទាយមានជ័យ ក្រោយពីទទួលបានសេចក្តីរាយការណ៍ពីប្រជាពលរដ្ឋ។
លោកវរសេនីយ៍ទោ ជ័យ សុកា មេបញ្ជាការ មូលដ្ឋានអាវុធហត្ថស្រុកស្វាយចេកបានឲ្យដឹងថា ជនសង្ស័យមានឈ្មោះ សាំង វ៉ាលីន ភេទប្រុស អាយុ៣០ឆ្នាំមានទីលំនៅបច្ចុប្បន្ន ភូមិស្លែង ឃុំ/ស្រុក ស្វាយចេក ខេត្តបន្ទាយមានជ័យ។ក្រោយពីឃាត់ខ្លួន វត្ថុតាងដែលដកហូតបានរួមមាន៖គ្រឿងញៀនមេតំហ្វេតាមីនទឹកកកចំនួន១០កូនថង់កិប ទម្ងន់១,៤៣ក្រាម, ម៉ូតូ០១គ្រឿង ម៉ាកហុងដាវេវ ផលិតឆ្នាំ២០១៨ ពណ៌ខ្មៅ ពាក់ស្លាកលេខ ប.ជ 1A-9436 និងសម្ភារៈមួយចំនួនទៀត។
លោកវរសេនីយ៍ទោ ជ័យ សុកា មេបញ្ជាការ បញ្ចាក់ថា ជនសង្ស័យខាងលើក្រោយពីធ្វើការឃាត់ខ្លួន ត្រូវបានសមត្ថកិច្ចមូលដ្ឋានអាវុធហត្ថស្រុក បញ្ជូនទៅបញ្ជាការដ្ឋានអាវុធហត្ថខេត្ត ដើម្បីធ្វើការសាកសួរចម្លើយតែម្ដង។ក្រោយពីសាកសួរចម្លើយរួច ជនសង្ស័យបានឆ្លើយសារភាពថា រូបគេពិតជាបានទិញគ្រឿងញៀនខាងលើយកមកលក់បន្តផង និងទុកប្រើប្រាស់ខ្លួនឯងផង។
ដោយផ្អែកលើវត្ថុតាង និងចម្លើយសារភាពរបស់ជនសង្ស័យ ទើបកម្លាំងការិយាល័យបទល្មើសគ្រឿងញៀនអាវុធហត្ថខេត្ត កសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនិតិវិធីច្បាប់នៅរសៀលថ្ងៃទី២៤ ខែធ្នូ ឆ្នាំ២០២០នេះ៕
.jpg)
.jpg)
