អ្នកដាំបន្លែត្រសក់ និងស្ពៃ នៅសង្កាត់កំពង់ស្វាយ ក្រុងសិរីសោភ័ណ្ឌ ត្អូញត្អែរពីការប្រមូលផលបានលក់ចេញក្នុងតម្លៃថោក ជាហេតុនាំឲ្យខាតបង់ និងបាក់ទឹកចិត្តក្នុងការដាំដុះបន្ត
ខេត្តបន្ទាយមានជ័យ៖បន្លែត្រសក់ និងស្ពៃគឺជាបន្លែមួយប្រភេទដែលមានទីផ្សារល្អ ហើយក៏មិនពិបាកក្នុងដាំដុះ និងថែប៉ុន្មានដែរ ប្រជាកសិករនៅតាមស្រុកស្រែចំការមួយចំនួនបានចាប់យកមុខរបរដាំបន្លែត្រសក់និងស្ពៃនេះ សម្រាប់ជញ្ជឹមគ្រួសារ តែឆ្នាំនេះដោយសារតែប្រទេសជួបនូវវិបត្តិជំងឺឆ្លងកូវីដ១៩ ជាហេតុនាំឲ្យស្ងាត់ ទើបបន្លែទាំងនេះទៅលើទីផ្សារមានការជុញ បានធ្វើឲ្យប្រជាកសិករប្រមូលផលបានហើយលក់ក្នុងតម្លៃថោក។
លោកស្រី ទុំ ធឿយ អាយុ៤៨ឆ្នាំ រស់នៅភូមិពង្រ សង្កាត់កំពង់ស្វាយ ក្រុងសិរីសោភ័ណ្ឌ ខេត្តបន្ទាយមានជ័យ បានមានប្រសាសន៍ ត្អូញត្អែរអំពីការលក់បន្លែត្រសក់ចេញក្នុងតម្លៃថោក ខណៈដែលោកស្រី និងក្រុមគ្រួសារខំដាំដុះបានផលហើយនោះ។លោកស្រីបញ្ជាក់ថា កាលពីឆ្នាំមុនៗ ក៏មិនដូចឆ្នាំនេះដែរ តម្លៃត្រសក់ថោហួស សឹងនឹងរកកម្លាំងធ្វើ និងបេះលក់ពុំបាន ដោយឆ្នាំមុនលក់ចេញក្នុង១គីឡូក្រាមតម្លៃ១៣០០រៀល តែឆ្នាំនេះបានតែ៤០០រៀល ទៅ៥០០រៀលតែប៉ុណ្ណោះដោយ
សារតែគ្មានឈ្មួញមកទិញ មានតែអ្នកទិញយកទៅលក់ផ្សារក្នុងភូមិ ម្យ៉ាងវិញទៀតមានឈ្មួញនាំយកមកពីបណ្តាលខេត្តផ្សេងៗ មកដាក់លក់ប្រជែងនៅលើទីផ្សារក្នុងខេត្តច្រើន ជាហេតុនាំឲ្យជុញណាមួយឆ្នាំនេះជួបវិបត្តិជំងឺឆ្លងកូវីដ១៩ ផងនោះ ទើបបានជាស្ងាត់គ្មានអ្នកមកទិញបែបនេះ។
ចំណែកប្រជាកសិករដាំស្ពៃឈ្មោះ ស៊ិក សៀក អាយុ៣០ឆ្នាំ វិញក៏មានការត្អូញត្អែមិនចាញ់អ្នកដាំត្រសក់ប៉ុន្មានដែរ ដោយលោកបញ្ជាក់ថា ជាធម្មតាឲ្យតែខែកត្តិករដូវត្រជាក់អាកាសធាតុល្អ គួបផ្សំជាមួយវិបត្តិជំងឺកូវីដ១៩ផង ពិសេសនៅតាមស្រុកភូមិផ្សេងៗដាំកើតព្រមគ្នាផងនោះ ទើបបានជាធូថ្លៃបែបនេះ ដោយបច្ចុប្បន្នប្រភេទស្ពៃក្រញ៉ាញ់ល្អក្នុង១គីឡូក្រាមតម្លៃ៨០០រៀល បើធម្មតា៥០០រៀល បើប្រៀបធៀបទៅនឹងឆ្នាំមុនមិនខុសគ្នានោះទេ។
ជាងនេះទៅទៀតពួកគាត់បានរៀបរាប់ត្អូញត្អែអំពីការខាតបង់ក្នុងការដាំដុះ ដោយចំណាយទាំងកម្លាំង សម្ភារៈ ថវិការក្នុងការជួលនិងទិញជាជី ថ្នាំបាញ់។ល។ទម្រាំបានផល នៅពេលទទួលបានផលហើយបែជាមិនមានទីផ្សារ ហើយលក់ក្នុងតម្លៃទាបទៀត។
បើតាមលោក អាង សាស ជាអាជីវករដែលមកទិញយកទៅលក់បន្តនៅតាមផ្សារក្នុងភូមិបានឲ្យដឹងដែរថា តម្លៃបន្លែត្រសក់និងស្ពៃចុះថោកនេះ មិនមែនលោកទិញបញ្ចុះដោយឯកឯងនោះទេ ដោយសារបន្លែដល់ព្រមគ្នា អ្នកលក់ដូរច្រើន និងជួបវិបត្តិជំងឺឆ្លងកូវីដ១៩ផង ទើបបណ្តាលឲ្យស្ងាត់មិនមានមនុស្សទិញបែបនេះ។លោកបញ្ចាក់ទៀតថា កាលពីឆ្នាំមុនៗមានតម្លៃខ្ពស់ដោយទិញពីចំការក្នុង១គីឡូក្រាមតម្លៃ១០០០ ទៅ១២០០រៀល យកទៅលក់បន្តនៅលើទីផ្សារអាចបានតម្លៃ១៥០០រៀលឯណោះ តែមកដល់ពេលនេះក្នុង១គីឡូក្រាមបានត្រឹមតែ៤០០រៀលតែប៉ុណ្ណោះជាហេតុធ្វើឲ្យប្រជាកសិកររងការខាតបង់ និងបាក់ទឹកចិត្តក្នុងការដាំដុះបន្ត ចំណែកលោកជាអ្នកទិញយកទៅលក់បន្តមិនពិបាកនោះទេ ព្រោះលោកទិញតម្រូវទីផ្សារតែប៉ុណ្ណោះ៕
