អាជ្ញាធរខ្មែរ ថៃ បើកកិច្ចប្រជុំពិភាក្សាបីចំនុចអោយពលករ និងអាជីវករកម្ពុជាចូលប្រកបការងារកសិកម្ម អាជីវកម្ម និងបើកច្រកស្ទឹងបត់
ខេត្តបាត់ដំបង៖ក្រោយមានការលើកស្នើពីភាគីខាងអាជ្ញាធរខេត្តស្រះកែវប្រទេសថៃ មកកាន់អាជ្ញាធរខេត្តបាត់ដំបង និង ខេត្តបន្ទាយមានជ័យ នៃព្រះរាជាណាចក្រកម្ពុជា ដើម្បីដោះស្រាយជូននិយោជកនិងជម្រុញឲ្យមានកំណើនសេដ្ឋកិច្ចក្នុងតំបន់។
ជាក់ស្តែងនៅព្រឹកថ្ងៃទី១៧ ខែធ្នូ ឆ្នាំ២០២០នេះ អាជ្ញាធរខេត្តស្រះកែវប្រទេសថៃ និងភាគីកម្ពុជាដែលមានអាជ្ញាធរខេត្តបាត់ដំបងនិងខេត្តបន្ទាយមានជ័យបានជួបប្រជុំគ្នានៅលើស្ពានមិត្តភាពកម្ពុជាថៃ នៃច្រកអន្តរជាតិភ្នំដីស្ថិតក្នុងស្រុកសំពៅលូនខេត្តបាត់ដំបង ដោយភាគីអាជ្ញាធរខាងប្រទេសថៃបានលើកសំណើសុំបើកកិច្ចប្រជុំពិភាក្សាជាមួយប្រទេសកម្ពុជាលើខ្លឹមសារ៣ ចំណុចសំខាន់ៗដែលឲ្យពលករកម្ពុជាចូលធ្វើការប្រមូលផលិតផលកសិកម្មនិងឲ្យអាជីវករកម្ពុជាចូលមកក្នុងព្រះរាជាណាចក្រថៃដើម្បីប្រកបអាជីវកម្ម នៅក្នុងតំបន់ផ្សាររុងក្លឿ និងបើកប្រើប្រាស់ស្ពានមិត្តភាពណងអៀន ស្ទឹងបត់ ស្រុកអារញ្ញ ជាច្រកដឹកទំនិញដើម្បីកាត់បន្ថយការកកស្ទះនៅច្រកព្រំដែនខ្លងលឹកស្រុកអារញ្ញ។
សំណើស្នើសុំនេះធ្វើឡើងតាមឯកសារផ្លូវការរបស់សាលាខេត្តស្រះកែវកាលពីថ្ងៃទី១៤ ខែធ្នូ ឆ្នាំ ២០២០ហើយការស្នើនេះ ខាងភាគីខេត្តស្រះកែវ ប្រទេសថៃដឹកនាំដោយអភិបាលខេត្តស្រះកែវ និងមានការចូលរួមពីមេបញ្ជាការ កងកម្លាំងបូពា៍,នាយករងសន្តិសុខផ្ទៃក្នុងខេត្តស្រះកែវតំណាងក្រសួងមហាផ្ទៃនៃប្រទេសថៃនិងអ្នកជាប់ពាក់ព័ន្ធជាច្រើនទៀតរបស់មន្ទីរស្ថាប័ននៅខេត្តស្រះកែវ និងភាគីកម្ពុជា មានខេត្តបាត់ដំបងដឹកនាំដោយឯកឧត្តម ងួន រតនៈ អភិបាលនៃគណៈអភិបាលខេត្តបាត់ដំបងនិងកងកម្លាំងប្រដាប់អាវុធទាំងបីប្រភេទ មន្ទីរពាក់ព័ន្ធនានា និងខេត្តបន្ទាយមានជ័យ ដឹកនាំដោយឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងអង្គភាពពាក់ព័ន្ធរបស់ខេត្តបន្ទាយមានជ័យផងដែរ។
ក្នុងកិច្ចប្រជុំនាព្រឹកនេះគោលបំណងសំខាន់គឺពិភាក្សាការងារពិគ្រោះយោបល់ការបន្ធូរបន្ថយច្បាប់ស្តីពីការគ្រប់គ្រងស្ថានការណ៍ក្នុងគ្រាអាសន្ន ដើម្បីដោះស្រាយដំណើរការសេដ្ឋកិច្ចក្នុងតំបន់ដែលមានរបៀបវរៈដូចខាងក្រោម:
១.ឲ្យពលករកម្ពុជាចូលទៅធ្វើការក្នុងវិស័យកសិកម្ម ក្នុងព្រះរាជាណាចក្រថៃ
២.ឲ្យអាជីវករកម្ពុជាចូលក្នុងព្រះរាជាណាចក្រថៃ ដើម្បីប្រកបអាជីវកម្ម នៅក្នុងតំបន់ផ្សាររោងក្លឿ
៣.បើកប្រើប្រាស់ស្ពានមិត្តភាពណងអៀន ស្ទឹងបត់ ស្រុកអារញ្ញ ជាច្រកដឹកទំនិញ ដើម្បីកាត់បន្ថយការកកស្ទះនៅច្រកព្រំដែនខ្លងលឹក ស្រុកអារញ្ញ។
សូមបញ្ជាក់ផងដែរថាចំពោះលទ្ធផលនៃកិច្ចប្រជុំមិនទាន់មានការឯកភាពទាំងស្រុងនោះទេ ស្ថិតក្នុងការពិភាក្សា រងចាំមានការឯកភាពជាគោលការណ៍បន្ថែមតាមក្រោយទៀត៕
