ជនសង្ស័យម្នាក់ ដែលជាប់ពាក់ព័ន្ធទៅនឹងករណីលួចម៉ូតូ នៅស្វាយរៀង ត្រូវបានសមត្ថកិច្ចចាប់ឃាត់ខ្លួន
ខេត្តស្វាយរៀង៖ជនសង្ស័យម្នាក់ ដែលជាប់ពាក់ព័ន្ធទៅនឹងករណីប្រើប្រាស់ ដោយខុសច្បាប់ នូវសារធាតុញៀន ត្រូវបានកម្លាំងសមត្ថកិច្ចក្រុងស្វាយរៀង ចាប់ឃាត់ខ្លួនកាលពីថ្ងៃទី១០ ខែធ្នូ ឆ្នាំ២០២០ ស្ថិតនៅក្នុងភូមិរោងបន្លែ សង្កាត់ស្វាយរៀង ក្រុងស្វាយរៀង ខេត្តស្វាយរៀង។
សមត្ថកិច្ចបានឲ្យដឹងថា ជនសង្ស័យមានឈ្មោះ ញ៉ាញ់ សារ៉ានពិសិដ្ឋ អាយុ២១ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិ-សង្កាត់ក្បែរផ្ទះកើតហេតុនេះ។ចំណែកម្ចាស់ម៉ូតូមានឈ្មោះមាស សុណាង ភេទស្រី អាយុ៣១ឆ្នាំ រស់នៅក្នុងភូមិរោងបន្លែ សង្កាត់ស្វាយរៀង ក្រុងស្វាយរៀង។រីឯម៉ូតូដែលជនសង្ស័យលួចនោះម៉ាកស៊ុយហ្ស៊ុយគីនិច ពណ៌ស ស៊េរីឆ្នាំ២០១៦ ពាក់ស្លាកលេខ ស្វាយរៀង ១I-៤៧៧៧។
សមត្ថកិច្ចបញ្ជាក់ថា មុនកើតហេតុជនសង្ស័យបានធ្វើសកម្មភាព ដើរចូលទៅក្នុងផ្ទះរបស់ឈ្មោះ មាស សុណាង លួចយកម៉ូតូមួយគ្រឿងម៉ាកនិចពណ៌ស ដែលម្ចាស់បញ្ឈរទុកនៅខាងមុខផ្ទះនិងមានជាប់ចង្កឹះសោ។ក្រោយពីធ្វើសកម្មភាពរួច ជននេះបានជិះម៉ូតូដែលលួចបានគេចខ្លួនទៅទិសខាងលិចបាត់ទៅ។
ក្រោយមកម្ចាស់ដឹងថា បាត់ម៉ូតូក៏ឆែកកាមេរ៉ាសុវត្ថិភាពមើល ទើបឃើញជនសង្ស័យលួចយកនិងជិះចេញទៅទិសខាងលិច ហើយក៏មកដាក់ពាក្យប្តឹងឱ្យសមត្ថកិច្ចជួយធ្វើអន្តរាគមន៍តែម្តង៕
