បែកធ្លាយថាលោក សុខ ពេញវុធ កំពុងឃុបឃិតជាមួយក្រុមអាជីវករយកចំណីផ្លូវធ្វើអាជីវកម្ម......
ភ្នំពេញ÷ សព្វថ្ងៃនេះគេសង្កេតឃើញថា មានបងប្អូនប្រជាពលរដ្ឋដែលជាអាជីវករជាច្រើននាក់ បានយកដីចំណីផ្លូវជាប់និងរបងវត្តឧណ្ណាលោមធ្វើអាជីវកម្មយ៉ាងអាណាធិបតេយ្យ បង្ករអោយប្រជាពលរដ្ឋដែលធ្វើដំណើរឆ្លងកាត់តាមផ្លូវមួយនេះត្អួញត្អែរយ៉ាងខ្លាំងដោយសារវាបង្ករអោយមានកកស្ទះជារៀងរាល់ថ្ងៃពិបាកក្នុងការធ្វើដំណើរ ។
តាមប្រភពពីអាជីវករម្នាក់(សុំមិនបញ្ចេញឈ្មោះ)បានប្រាប់អង្គភាពគេហទំព័ររស្មីជាយដែនយើងឲ្យដឹងថា ពួកគាត់អាចលក់ដូរបានរាល់ថ្ងៃនេះ គឺដោយសារពួកគាត់បានបង់ប្រាក់អោយទៅខណ្ឌដូនពេញក្នុងមួយកន្លែង៣០ដុល្លា ក្នុងមួយខែ។ អាជីវករបានបន្តថា ប្រសិនបើអាជីវករណាម្នាក់មិនបង់ប្រាក់អោយទៅខណ្ឌដូនពេញទេនោះ គឺមិនអាចលក់ដូរនៅលើដីចំណីផ្លូវបាននោះទេ ប្រាកដជាត្រូវដេញចេញមិនអោយលក់ដូរឡើយ ។ ប្រភពពីពលរដ្ឋបន្តថា ជារៀងរាល់ខែគឺតែងតែមានកំលាំងរបស់ខណ្ឌដូនពេញ ចុះមកប្រមូលលុយពីអាជីវករមួយកន្លែង៣០ដុល្លា មិនចាំបាច់ទៅបង់ដល់ខណ្ឌនោះទេ។ មហាជាច្រើនបានលើកឡើងថា ដោយសារតែអំនាចលុយបានធ្វើអោយមនុស្សមួយចំនួនភ្លេចតួនាទី ភ្លេចបំពេញភារកិច្ចជាមន្រ្តីល្អ សុខចិត្តអោយការងារ រឺ តំបន់របស់ខ្លួនរញ៉េរញ៉ៃ ដោយមិនខ្វល់អ្វីដែលប្រមុខថ្នាក់ដឹកនាំតែងតែបញ្ជារ រឺ ណែនាំឡើយ។
ពាក់ព័ន្ធទៅនិងបញ្ហាដូចខាងលើ នៅថ្ងៃទី១៤ ខែមករា ឆ្នាំ២០២០ លោក សុខ ពេញវុធ បានប្រាប់សារព័ត៌មាន យើងកាលថ្ងៃទី១៤ថា លោកបានបញ្ជារអោយកំលាំងក្រោមឱវាទចុះរៀបចំសណ្តាប់ធ្នាប់នៅចំណុចខាងខាងជំហៀងនិងខាងក្រោយវត្តឧណ្ណាលោម ២ ទៅ ៣សប្តាហ៍មកហើយ។ ម្យ៉ាងវិញទៀតនៅថ្ងៃទី១៤ ខែមករានេះ ក៏មានកំលាំងរបស់លោកកំពុងចុះរៀបចំសណ្តាប់ធ្នាប់ផងដែរ។ ដោយឡែកករណីដែលពលរដ្ឋចោទថា បានបង់លុយអោយទៅខាងខណ្ឌដូនពេញក្នុងមួយកន្លែង៣០ដុល្លាក្នុងមួយខែនោះ មិនមែនជាការពិតនោះទេ ។ ទោះបីជាមានការបកស្រាយយ៉ាងណាក្តី តាមប្រភពព័ត៌មានបានឲ្យដឹងថា អាជីវករនៅតែបន្តលក់ដូរនៅលើចំណីផ្លូវជាប់និងរបងវត្តឧណ្ណាលោមដដែល មិនមានអាជីវករណារុះរើចេញពីចំណីផ្លូវនោះទេ៕
