លោក ង៉ោ ម៉េងជ្រួញ អញ្ជើញជាអធិបតីក្នុងសិក្ខាសិលាសមាហរណកម្ម កម្មវិធីវិនិយោគបីឆ្នាំរំកិលសង្កាត់ នៅថ្នាក់ក្រុងឆ្នាំ២០២០ សម្រាប់រៀបចំនិងកសាងកម្មវិធីវិនិយោគបីឆ្នាំរំកិលឆ្នាំ២០២១-២០២៣
ខេត្តបន្ទាយមានជ័យ៖លោក ង៉ោ ម៉េងជ្រួញ អភិបាលរងខេត្តបន្ទាយមានជ័យតំណាងឱ្យឯកឧត្តម អ៊ុ រាត្រី អភិបាល នៃគណៈអភិបាលខេត្ត លោក កែវ តារារស្មី អភិបាលរងក្រុងប៉ោយប៉ែតតំណាងឲ្យលោក គាត ហ៊ុល អភិបាលនៃគណៈអភិបាលក្រុង លោកស្រី ព្រុំ ស៊ីណា ប្រធានមន្ទីរផែនការខេត្ត កាលពីព្រឹកថ្ងៃទី៤ ខែវិច្ឆិកា ឆ្នាំ២០២០ បានអញ្ជើញជាអធិបតីក្នុងសិក្ខាសិលាសមាហរណកម្ម កម្មវិធីវិនិយោគបីឆ្នាំរំកិលសង្កាត់ នៅថ្នាក់ក្រុងឆ្នាំ២០២០ សម្រាប់រៀបចំនិងកសាងកម្មវិធីវិនិយោគបីឆ្នាំរំកិលឆ្នាំ២០២១-២០២៣។
ពិធីនេះបានប្រព្រឹត្តទៅនៅក្នុងសាលប្រជុំសាលាក្រុងប៉ោយប៉ែត ដោយមានការអញ្ជើញចូលរួមពីលោក ទ្បេង ហុងលាង មេបញ្ជាការផ្នែកសឹកប៉ោយប៉ែត លោក លោកស្រីចំណុះឲ្យរដ្ឋបាលខេត្ត លោក លោកស្រី ចំណុះឱ្យក្រុមប្រឹក្សាក្រុង មេបញ្ជាការរងក្រុង អធិការរងក្រុង ចៅសង្កាត់ទាំងបីក្នុងក្រុង និងមន្ត្រីជុំវិញក្រុង ព្រមទាំងអង្គការជាតិនិងអន្តរជាតិសរុបចំនួន៦៧រូបផងដែរ។
ក្នុងឱកាសនោះលោកអភិបាលរងខេត្តបានមានប្រសាសន៍ កោតសរសើរដល់អាជ្ញាធរក្រុង កងកម្លាំងប្រដាប់អាវុធទាំងបីប្រភេទ នឹងអាជ្ញាធរមូលដ្ឋាន ព្រមទាំងសប្បុរសជននានា ដែលបានចូលរួមចំណែកជួយសង្គ្រោះដល់ពលរដ្ឋដែលរងគ្រោះដោយសារទឹកជំនន់ ពីកន្លែងរងគ្រោះ ដឹកជម្លៀសមកដាក់ទីទួលសុវត្ថិភាពប្រកបដោយជោគជ័យ ហើយមិនត្រឹមតែប៉ុណ្ណោះយើងនូវតែបន្តការគាំទ្រ ការលើកទឹកចិត្ត ការឧបត្ថម្ភ ការទទួលខុសត្រូវចំពោះបងប្អូនប្រជាពលរដ្ឋតែមកស្នាក់អាស្រ័យនៅទីទួលសុវត្ថិភាព រហូតទៅដល់ទឹកស្រក់យើងធ្វើការដឹកជញ្ជូនទៅលំនៅដ្ឋានពួកគាត់វិញ នេះសបញ្ជាក់ថា ជាការទទួលខុសត្រូវរបស់អាជ្ញាធរមូលដ្ឋាន និងការចូលរួមពីអង្គការសប្បុរសជននានាផងដែរ។
ជាមួយគ្នានោះដែរលោកអភិបាលរងក្រុងបានមានប្រសាសន៍ថា កន្លងមករដ្ឋបាលក្រុងបានខិតខំបំពេញតាមតួនាទី និងភារកិច្ចរបស់ខ្លួនយ៉ាងខ្ជាប់ខ្ជួន តាមច្បាប់ស្តីអំពីការគ្រប់គ្រងរដ្ឋបាលរាជធានី ខេត្ត ស្រុក ក្រុង ខណ្ឌ និងកម្មវិធីជាតិសម្រាប់ផែនការអភិវឌ្ឍន៍យ៉ាងច្បាស់លាស់សម្រាប់ការរីកចម្រើនរបស់ក្រុងដើម្បីកាត់បន្ថយភាពក្រីក្ររបស់ប្រជាពលរដ្ឋ ខិតខំពង្រឹង សន្តិសុខសណ្ដាប់ធ្នាប់លើកកម្ពស់សុវត្ថិភាពសាធារណៈឱ្យបានល្អ ជាពិសេសអនុវត្តឲ្យបានខ្ជាប់ខ្ជួនក្នុងគោលនយោបាយភូមិឃុំមានសុវត្ថភាព ដោយគ្រប់គ្រងបាននូវស្ថានភាពសន្តិសុខទាំងផ្ទៃក្នុងនឹងតាមបន្ទាត់ព្រំដែន នឹងមានប្រតិបត្តិការល្អជាមួយភាគីថៃ ដើម្បីបង្កឲ្យមានការងាយស្រួលសម្រាប់បងប្អូនប្រជាពលរដ្ឋ។
លោកបញ្ជាក់ថា កម្មវិធីវិនិយោគបីឆ្នាំរំកិលសង្កាត់នៅថ្នាក់ក្រុង ឆ្នាំ២០២០-២០២១នាពេលនេះគឺជាដំណើរការរៀបចំឡើងដើម្បីគាំទ្រគម្រោងសកម្មភាពអនុវត្ត ដើម្បីស្នើឡើងឱ្យស៊ីចង្វាក់គ្នាទៅនឹងគោលនយោបាយយុទ្ធសាស្ត្រសកម្មភាពនានារបស់មន្ទីរជំនាញ និងបណ្ដាអង្គការនានាទាំងជាតិ និងអន្តរជាតិតាមរយៈការចូលរួមសិក្ខាសិលាការចចារ កាលវិភាគរវាងមន្ទីរជំនាញ និងអង្គការការនានាមានការទំនាក់ទំនងគ្នាដើម្បីប្រមូលផ្ដុំនូវធនធានក្នុងការអភិវឌ្ឍន៍របស់ក្រុង៕
