ឯកឧត្តម ជាវ តាយ អញ្ជើញជួបសំណេះសំណាលជាមួយលោកគ្រូ អ្នកគ្រូ និងសិស្សថ្នាក់ទី១២ ឆ្នាំសិក្សា២០១៩-២០២០ ក្នុងស្រុកកំពង់ត្រាច
ខេត្តកំពត៖ក្នុងឱកាសអញ្ជើញជួបសំណេះសំណាលជាមួយលោកគ្រូ អ្នកគ្រូ សិស្សានុសិស្សថ្នាក់ទី១២ ឆ្នាំសិក្សា២០១៩-២០២០ មកពីវិទ្យាល័យទាំង២ ក្នុងស្រុកកំពង់ត្រាច ដែលត្រូវត្រៀមប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី២១ ខែធ្ធ្នូ ឆ្នាំ២០២០ខាងមុខនេះ ថ្ងៃសុក្រ ១៣រោច ខែកត្តិក ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៣ ខែវិច្ឆិកា ឆ្នាំ២០២០ ឯកឧត្តម ជាវ តាយ អភិបាលនៃគណៈអភិបាលខេត្តកំពត មានប្រសាសន៍បញ្ចាក់ថា បច្ចុប្បន្នពិភពលោកស្ថិតក្នុងបរិបទ រងការញាំញីដោយឥទ្ធិពលជំងឺកូវីដ១៩។ប៉ុន្តែក្នុងនោះកម្ពុជាយើង ពិសេសក្នុងខេត្តកំពត ពុំមានបញ្ហាការឆ្លងជំងឺកូវីដ១៩ មកចូលដល់ក្នុងសហគមន៍ឡើយ។ប៉ុន្តែទោះបីយ៉ាងនេះក្ដី ឯកឧត្តមបានផ្ដាំផ្ញើដល់អាជ្ញាធរមូលដ្ឋាន ប្រជាពលរដ្ឋ ពិសេសលោកគ្រូ អ្នកគ្រូ សិស្សានុសិស្សអាណាព្យាបាល ទាំងអស់ ដែលបានកំពុងបង្កលក្ខណៈនិងបានសិក្សាត្រៀមក្នុងការប្រឡងសញ្ញាបត្រមធ្យមសិក្សាទុតិយភូមិ ដែលប្រព្រឹត្តទៅនៅថ្ងៃខាងមុខនេះ ត្រូវតែបន្តបង្កើនការប្រុងប្រយ័ត្នទាំងអស់គ្នា ដើម្បីបង្ការទប់ស្កាត់កុំឱ្យជំងឺកូវីត១៩នេះ ឆ្លងចូលដល់ក្នុងសហគមន៍យើងឲ្យបានជាដាច់ខាត។
ជាងនេះទៅទៀតឯកឧត្តមអភិបាលខេត្ត ផ្ដាំផ្ញើដល់សិស្សានុសិស្ស ឲ្យបង្កើនការចូលរួមគោរពច្បាប់នានា ពិសេសបញ្ចៀសការចរាចរនិងប្រើប្រាស់គ្រឿងញៀន ព្រមទាំងគោរពច្បាប់ចរាចរណ៍ផ្លូវគោក ឲ្យបានជាដាច់ខាត ព្រោះបច្ចុប្បន្នបញ្ហាគ្រឿងញៀន នឹងបញ្ហាគ្រោះថ្នាក់ចរាចរណ៍ បានបំផ្លាញអាយុជីវិត និងទ្រព្យសម្បត្តិព្រមទាំងធនធានមនុស្សក្នុងសង្គមកម្ពុជាយើងដែលរាជរដ្ឋាភិបាល បាននឹងកំពុងយកចិត្តទុកដាក់យ៉ាងខ្លាំង។
ក្នុងឱកាសនោះឯកឧត្តម ជាវ តាយ ក៏បានផ្ដល់ជូននូវថវិកាសរុប១៤,៤៦០,០០០រៀល ជូនដល់លោកគ្រូ អ្នកគ្រូបង្រៀនថ្នាក់ទី១២និងគណៈគ្រប់គ្រងសាលាសរុបចំនួន៥៦នាក់ម្នាក់ៗ៥ម៉ឺនរៀល និងសិស្សានុសិស្សចំនួន៥៨៣នាក់ ក្នុងម្នាក់ៗទទួលបានថវិកាចំនួន២ម៉ឺនរៀល និងសៀវភៅកម្រងវិញ្ញាសារផងដែរ ព្រមទាំងឧបត្តម្ភកងកម្លាំងសរុបចំនួន១០នាក់ ដោយម្នាក់ៗទទួលបានថវិកា២ម៉ឺនរៀលផងដែរ៕