សមត្ថកិច្ចឃាត់ខ្លួន ជនសង្ស័យម្នាក់ ពាក់ពន្ធ័ទៅនឹងករណីលួចម៉ូតូ
ខេត្តកណ្តាល៖ជនសង្ស័យឈ្មោះ ឡុង ឌីណេត ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅភូមិ-សង្កាត់កើតហេតុ ត្រូវបានកម្លាំងប៉ុស្តិ៍ដើមមៀន សហការជាមួយកម្លាំងយុត្តិធម៌ក្រុងតាខ្មៅ ដឹកនាំដោយលោកអធិការរងទទួលការងារយុត្តិធម៌ ចាប់ឃាត់ខ្លួនកាលពីវេលាម៉ោង១៨និង៣០នាទី ថ្ងៃទី០៩ ខែវិច្ឆិកា ឆ្នាំ២០២០ បន្ទាប់ពីធ្វើសកម្មភាំលួច (ម៉ូតូ) របស់ជនរងគ្រោះឈ្មោះ សឿក ម៉ារិន ភេទប្រុស អាយុ៣៦ឆ្នាំ មានទីលំនៅភូមិ-សង្កាត់កើតហេតុ មុខរបរជាងជួសជុលម៉ូតូ នៅចំណុចភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល។
វត្ថុតាងដែលកម្លាំងសមត្ថកិច្ចដកហូតបានម៉ូតូមួយគ្រឿងម៉ាក yamaha sirius ពណ៌ខ្មៅ ផលិតឆ្នាំ២០១៨ ផ្លាកលេខកណ្តាល ១AC1349 (ជនរងគ្រោះ)។
សមត្ថកិច្ចបានឲ្យដឹងថា ជនសង្ស័យបានធ្វើសកម្មភាពលួចម៉ូតូរបស់ជនរងគ្រោះ ដែលចតទុកមុខផ្ទះ ហើយជិះរត់គេចខ្លួនបាត់ បន្ទាប់មកជនរងគ្រោះ បានទៅដាក់ពាក្យបណ្តឹងនៅប៉ុស្តិ៍ដើមមៀន ឲ្យជួយស្រាវជ្រាវស្វែងរកជនសង្ស័យ ចាត់ការតាមច្បាប់។ក្រោយពីទទួលបានពាក្យបណ្តឹងរួចមក កម្លាំងប៉ុស្តិ៍ដើមមៀន សហការជាមួយកម្លាំងយុត្តិធម៌ក្រុងតាខ្មៅ ដឹកនាំដោយលោកអធិការរងទទួលការងារយុត្តិធម៌ បានចុះស្រាវជ្រាវរហូតឃាត់ខ្លួនបានជនសង្ស័យ និងវត្ថុតាង នៅចំណុចភូមិលេខ១ក សង្កាត់ស្វាយរលំ ក្រុងតាខ្មៅ ខេត្តកណ្តាល រួចបញ្ជូនមកអធិការដ្ឋាននគរបាលក្រុងតាខ្មៅ បន្តចាត់ការតាមនីតិវិធី តែម្តង។នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចម៉ូតូខាងលើ របស់ជនរងគ្រោះប្រាកដមែន ព្រោះដោយសារខ្លួនចាញ់ល្បែង៕