មនុស្សចំនួន៣នាក់រងរបួស និងរថយន្តហាយឡេនឌ័រ១គ្រឿង រងការខូចខាតទាំងស្រុង ដោយសារផ្ទុះហ្គាសពីរថយន្ត
ខេត្តបន្ទាយមានជ័យ:យ៉ាងហោចណាស់មានមនុស្សចំនួន៣នាក់បានរងរបួសបញ្ជូនទៅសង្គ្រោះនៅឯមន្ទីរពេទ្យ ចំណែករថយន្ត១គ្រឿងរងការខូចខាតទាំងស្រុង ក្នុងករណីផ្ទុះធុងហ្គាសរថយន្ត។
ហេតុការណ៍ដ៏គួរឲ្យភ្ញាក់ផ្អើលនេះបានកើតឡើង នៅវេលាម៉ោង១៨និង៤០នាទីល្ងាចថ្ងៃ ១៤កើត ខែកក្តិក ឆ្នាំជូត ទោស័ក ពស២៥៦៤ ត្រូវនិងថ្ងៃទី៣០ ខែតុលា ឆ្នាំ២០២០ នៅចំនុចមណ្ឌល៦ ស្ថិតនៅក្នុងភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
បើតាមប្រភពព័ត៌មានពីប៉ុស្តិ៍នគរបាលផ្សារកណ្ដាលបានឲ្យដឹងថា មុនកេីតហេតុមានរថយន្តម៉ាកហាយឡេនឌឺពាក់ស្លាកលេខ បន្ទាយមានជ័យ 2A-៩៥៦៧ អ្នកបេីកបរដោយឈ្មោះ សារ៉ាត កន្និកា ភេទស្រី អាយុ៣៨ឆ្នាំ រស់នៅកន្លែងកេីតហេតុខាងលើបានចូលមកបញ្ចូលហ្គាសក្នុងរថយន្តចំនួន១៥គីឡូក្រាម នៅកន្លែងបញ្ចូលហ្គាសឈ្មោះ មុំ សុភក្រ័ ភេទប្រុស អាយុ២១ឆ្នាំ(ត្រូវជាបងប្អូនជីដូនមួយ) ខណ:ពេលកំពុងបញ្ចូលហ្គាសក៏បានផ្ទុះហ្គាសរថយន្ត បណ្តាលអោយភាយចំហាយហ្គាសចេញមកខាងក្រៅចំឆ្នាំងស៊ុបនៅក្បែរនោះ បណ្តាលអោយមានអគ្គីភ័យឆាប់ឆេះតែម្តង។
ក្រោយពីកើតហេតុភ្លាម កម្លាំងសមត្ថកិច្ចទាំងបីប្រភេទរួមនិងអាជ្ញាធរមូលដ្ឋាន បាននាំយកនូវរថយន្តពន្លត់អគ្គីភ័យ ចុះមកដល់ចំណុចកើតហេតុយ៉ាងសស្រាក់សស្រាំ ដើម្បីធ្វើការបាញ់ពន្លត់ទាន់ពេលវេលា មិនបណ្ដាលឱ្យរាលដាលដល់ផ្ទះអ្នកដទៃ។នៅក្នុងហេតុការណ៍នោះដែលគេសង្កេតឃើញមានវត្តមានលោកអភិបាលក្រុងប៉ោយប៉ែតផងដែរ ចុះពិនិត្យចាក់ស្ដែង នឹងបន្តសួរសុខទុក្ខអ្នករងគ្រោះនៅឯមន្ទីរពេទ្យផងដែរ។
សមត្ថកិច្ចបន្តថា ផផលប៉ះពាល់រួមមាន:
១-ឆេះរថយន្តម៉ាកហាយឡេនដឺខាងលេីខូចខាតទាំងស្រុង
២-ឆេះខ្សែចរន្តអគ្គីសនីដែលបន្តោងល
បង្គោលភ្លេីង
៣-គ្រឿងលក់ចាប់ហួយ និងគ្រឿងទេសមួយចំនួន។ដោយឡែកជនរងគ្រោះមានចំនួនបីនាក់
១-ឈ្មោះ សារ៉ាក កក្កដា ភេទប្រុស អាយុ១៤ឆ្នាំ រងរបួសជេីងទាំងសងខាង
២-ឈ្មោះហ៊ន់ សុវណ្ណារី អាយុ៥ឆ្នាំ រងបួសរលាកដៃជេីង និងផ្ទៃមុខ
៣-ឈ្មោះហ៊ន់ ដាណេ អាយុ៧ឆ្នាំ រងបួសរលាកដៃជេីងនិងផ្ទៃមុខ។
សូមបញ្ជាក់ផងដែរថា អគ្គីភ័យបានរលត់ទាំងស្រុងនៅវេលាម៉ោងជាង១៩យប់ ក្រោមការសហការណ៍ពីរថយន្តអគ្គីភ័យរបស់អធិការដ្ឋាននគរបាលក្រុងប៉ោយប៉ែតមួយគ្រឿង និងរថយន្តអគ្គីភ័យរបស់ក្រុមហ៊ុនត្រូពីកាណាចំនួន២គ្រឿងផងដែរ៕