ទឹកស្ទឹងសង្កែហក់ឡើងជាថ្មី អាជ្ញាធរប្រកាសឲ្យពលរដ្ឋបង្កើនការប្រុងប្រយ័ត្ន
ខេត្តបាត់ដំបង៖ទឹកស្ទឹងសង្កែ នៅថ្ងៃទី២៣ ខែតុលា ឆ្នាំ២០២០នេះ បានហក់ឡើងយ៉ាងគំហុកជាលើកទី២ អាជ្ញាធរខេត្តបាត់ដំបង ប្រកាសឲ្យប្រជាពលរដ្ឋនៅតាមបណ្តោយដងស្ទឹង ព្រែក និងអូរ បង្កើនការប្រុងប្រយ័ត្នខ្ពស់ដើម្បីសុវត្ថិភាព។
ដោយសារស្ថានភាពទឹកភ្លៀងចេះតែបន្តធ្លាក់ជាបន្តបន្ទាប់នៅផ្នែកខាងលើ នៃតំបន់ព្រំដែន និងស្រុកសំឡូតចាប់តាំងពីយប់ថ្ងៃទី២១ ខែតុលា ឆ្នាំ២០២០ កន្លងទៅបណ្តាលអោយកម្ពស់ទឹកបានហក់ឡើងខ្ពស់រហូតពេញអាងស្តុកទឹកពហុបំណងសេកសក មន្ត្រីជំនាញបង្ខំចិត្តបើកទ្វារទឹកទំលាក់ចូលស្ទឹងសង្កែ បង្កអោយកើតមានជំនន់នេះឡើង។ហើយជាមួយហ្នឹងជំនន់នេះដែរ បើគិតត្រឹមម៉ោង១២និង៥០នាទីថ្ងៃទី២៣នេះ នៅចំណុចគល់ស្ពានថ្មសម្តេចតេជោ ហ៊ុន សែន ស្ថិតក្នុងក្រុងបាត់ដំបង កម្ពស់ទឹកបានហក់ឡើងខ្ពស់រហូតទៅដល់១៣ម៉ែត្រ៦០ហើយ ខណ:អាកាសធាតុនៅក្នុងក្រុងបាត់ដំបង នាពេលនេះពពកបានបិទបាំងផ្ទៃមេឃអោយស្រទុំផងដែរ។
ហើយជាមួយគ្នានេះ គេសង្កេតឃើញថ្នាក់ដឹកនាំមានស្នងការនគរបាលខេត្ត ទីបញ្ជាការកងរាជអាវុធហត្ថខេត្ត ទីបញ្ជាការយោធភូមិភាគទី៥ រួមនឹងកម្លាំងមន្ត្រីជំនាញផ្សេងទៀតបានកំណត់ឲ្យក្រុមប្រចាំបញ្ជាវេននីមួយៗត្រូវមានវត្តមានទាំងអស់ ដើម្បីត្រៀមអន្តរាគមន៍ ដោះស្រាយបញ្ហាជូនប្រជាពលរដ្ឋឲ្យបានរហ័សបំផុត៕