ឯកឧត្តម គួច ចំរើន ដឹកនាំមន្ត្រីជំនាញ អាជ្ញាធរឃុំ ស្រុកចុះពិនិត្យស្ថានភាពជំនន់ទឹកភ្លៀង នៅស្រុកព្រៃនប់
ខេត្តព្រះសីហនុ:ឯកឧត្តម គួច ចំរើន អភិបាល នៃគណៈអភិបាលខេត្តព្រះ សីហនុ ណែនាំអាជ្ញាធរមូលដ្ឋាន ត្រូវតាមដានស្ថានភាពអាកាសធាតុ ជាប់ជាប្រចាំ ប្រសិនមានភាពចាំបាច់យើងជួយសង្គ្រោះប្រជាពលរដ្ឋ របស់យើងបានទាន់ពេលវេលា។
ឯកឧត្តមអភិបាលខេត្ត មានប្រសាសន៍ ណែនាំដល់អាជ្ញាធរមូលដ្ឋានបែបនេះបានធ្វើឡើងនៅព្រឹកថ្ងៃសុក្រ ១៤រោជ ខែអស្សុជ ឆ្នាំជូត ទោស័កព.ស ២៥៦៤ ត្រូវនឹងថ្ងៃទី១៦ ខែតុលា ឆ្នាំ២០២០ ខណ:ដែលឯកឧត្តមអញ្ជើញដឹកនាំមន្ត្រីជំនាញ អាជ្ញាធរឃុំ ស្រុក ចុះពិនិត្យស្ថានភាពជំនន់ទឹកភ្លៀង នៅឃុំទួលទទឹង ស្រុកព្រៃនប់ ខេត្តព្រះសីហនុ ។
ក្នុងឱកាសនោះ ឯកឧត្តម អភិបាលខេត្តព្រះសីហនុ បានដឹកនាំមន្ត្រីជំនាញ និងអាជ្ញាធរឃុំ ស្រុក ចុះពិនិត្យជំនន់ទឹកភ្លៀងនៅតាមខ្នងផ្ទះប្រជាពលរដ្ឋ និងបន្តចុះពិនិត្យមើលតាមអូ ប្រឡាយរំដោះទឹកជំនន់ ដោយបញ្ជាគ្រឿងចក្រចំនួន៩គ្រឿង បែងចែកជាពីរគោលដៅ ដេីម្បីរំដោះទឹកចេញពីភូមិ។
សូមរំលឹកថាកាលពីថ្ងៃទី១៧ ខែកញ្ញា ឆ្នាំ២០២០ កន្លងមក ជំនន់ទឹកភ្លៀងបានធ្វើឲ្យជន់លិចឃុំចំនួន៣ ក្នុងស្រុកព្រៃនប់ ខេត្តព្រះសីហនុ មានដូចជា ឃុំទួលទទឹង ឃុំសំរុង និងឃុំអណ្តូងថ្ម ខេត្តព្រះសីហនុ៕
