ឯកឧត្តម គង់ សោភ័ណ្ឌ អញ្ជើញជួបសំណេះសំណាល ជាមួយថ្នាក់ដឹកនាំ និងមន្រ្ដីរាជការ នៃមន្ទីរកសិកម្ម រុក្ខាប្រមាញ់ និងនេសាទខេត្ត
ខេត្តកណ្តាល៖កាលពីព្រឹកថ្ងៃទី១៦ ខែតុលា ឆ្នាំ២០២០នេះឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល អញ្ជើញជួបសំណេះសំណាល ជាមួយថ្នាក់ដឹកនាំ និងមន្រ្ដីរាជការ នៃមន្ទីរកសិកម្ម រុក្ខាប្រមាញ់ និងនេសាទ ខេត្ត ដោយមានការអញ្ជើញចូលរួមពី ឯកឧត្តម លោកជំទាវ អភិបាលរងខេត្ត មន្ទីរជុំវិញខេត្ត និងមន្ត្រីនៃមន្ទីរកសិកម្មជាច្រើនរូបផងដែរ។
ក្នុងឱកាសនោះឯកឧត្តម អភិបាលខេត្ត បានមានប្រសាសន៍លើកទឹកចិត្ត ដល់មន្ទីរកសិកម្មខេត្ត ត្រូវត្រៀមធ្វើផែនការ ពាក់ព័ន្ធនឹងការងារបង្កបង្កើនផល បន្លែក្នុងផ្ទះសំណាញ់ ការចិញ្ចឹមសត្វ ការដាំកូនឈើ និងការងារបង្ក្រាបបទល្មើសនេសាទ ឲ្យបានទ្វេដងនៅឆ្នាំក្រោយនេះ ដើម្បីធ្វើឲ្យវិស័យកសិកម្មនៅខេត្តកណ្ដាលកាន់តែរីកចម្រើន លើកស្ទួយកម្រិតជីវភាពរបស់ប្រជាពលរដ្ឋ និងកាត់បន្ថយភាពក្រីក្រ។
ឯកឧត្តមបានបញ្ជាក់ថា មន្ទីរកសិកម្ម រុក្ខាប្រមាញ់ និងនេសាទខេត្តកណ្ដាល មានតួនាទីសំខាន់ណាស់ ក្នុងការងារគ្រប់គ្រងវិស័យកសិកម្មនៅមូលដ្ឋាន ដើម្បីជួយបង្កើនជីវភាពជូនប្រជាពលរដ្ឋ ក្នុងអំឡុងពេលប្រយុទ្ធប្រឆាំងនឹងជំងឺ កូវីដ-១៩នេះ ស្របតាមគោលនយោបាយ និងប្រសាសន៍ដឹកនាំដ៏ខ្ពង់ខ្ពស់ របស់សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញនូវអនុសាសន៍ថា ក្នុងអំឡុងពេលប្រយុទ្ធប្រឆាំងនឹងជំងឺរាតត្បាត នៃជំងឺកូវីដ-១៩ នេសូមបងប្អូនប្រជាពលរដ្ឋទាំងអស់ ក្រោកឈរឡើង ខិតខំបង្កបង្កើនផល លើវិស័យកសិកម្មសម្រាប់ហូបដោយខ្លួនឯង ដោយមិនចាំបាច់ពឹងផ្អែកការនាំចូលពីខាងក្រៅ។
ក្នុងនោះដែរ ឯកឧត្តមក៏បានជម្រុញឲ្យមន្ទីរកសិកម្មខេត្ត ត្រូវបន្តចុះផ្សព្វផ្សាយ និងផ្ដល់ជាបច្ចេកទេសជំនាញ ក្នុងការជម្រុញ ដល់ការបង្កបង្កើនផលដូចជា ការដាំដុះបន្លែសុវត្តិភាព បន្លែបង្ការផ្សេងៗ និងការចិញ្ចឹមសត្វជាដើម ជូនដល់ប្រជាកសិករដល់មូលដ្ឋាន ត្រូវខិតខំជួយដោះស្រាយបញ្ហាប្រឈមនានា ជូនពួកគាត់នៅពេលដែលពួកគាត់ជួបបញ្ហាក្នុងការបង្កបង្កើនផលឲ្យបានទាន់ពេលវេលា ។ ជាពិសេសត្រូវគៀងគររកទីផ្សារឲ្យបានច្រើនជូនប្រជាកសិករ ឲ្យទទួលបានកម្រៃខ្ពស់ ដើម្បីជួយលើកកម្ពស់កម្រិតជីវភាព និងកាត់បន្ថយភាពក្រីក្រ៕
