លោកចោរម្នាក់មានគម្រោងចូលលួចទ្រព្យសម្បត្តិដល់ពេលម្ចាស់ដឹងខ្លួនទាន់លោកចោរបាន......
(ក្រុងប៉ោយប៉ែត)
លោកចោរម្នាក់បានជិះម៉ូតូ មានគម្រោងការចង់ចូលលួច តែមិនបានសម្រេច ត្រូវម្ចាស់ផ្ទះដឹង រត់បាតជើងសព្រៀត បន្សល់នូវម៉ូតូ សេរី ឆ្នាំ២០១៥ មួយគ្រឿង ត្រូវបានសមត្ថកិច្ច យកមករក្សាទុក នៅអធិការដ្ឋាននគរបាលក្រុងប៉ោយប៉ែត ។ ដែលហេតុការណ៍នេះបានកើតឡើង នៅវេលាម៉ោងជាង០៨ព្រឹក ថ្ងៃទី២៥ ខែកញ្ញា ឆ្នាំ២០១៩ នៅចំនុចកែងស្តង់ជ្រូក ក្នុងភូមិបាលិលេយ្យ១ សង្កាត់ និងក្រុងប៉ោយប៉ែត ខេត្តបន្ទាយមានជ័យ។ លោកវរសេនីយ៍ឯក ធិន សុិនដេត អធិការនគរបាលក្រុងប៉ោយប៉ែត បានឲ្យអង្គភាពសារព័ត៌មានយើងឲ្យដឹងថា៖ ដោយមានពលរដ្ឋបានរាយការណ៍មកថា៖ មានករណីជនសង្ស័យម្នាក់ (ចោរ) មានបំណងចង់ចូលលួចទ្រព្យសម្បត្តិ របស់គាត់ ដោយពលរដ្ឋបានដឹងខ្លួនទាន់ លោកចោរម្នាក់នោះ ក៌ដាក់មេប្រូច រត់កាត់ទឹក រកតែព្រះអាយុ បាត់ស្រមោលឈឹងតែម្តង ។ លោកបានបន្តទៀតថា៖ ក្នុងហេតុការណ៍ខាងលើនេះ លោកចោរស៊យធំហើយ ចង់ចូលលួចទ្រព្យសម្បត្តិ របស់ពលរដ្ឋ បែជាម្ចាស់ដឹងខ្លួនទាន់ រត់ចោលម៉ូតូ១គ្រឿង ម៉ាកហុងដាទ្រីម សេរីឆ្នាំ២០១៥ ដែលមានស្លាកលេខ កណ្តាល 1F 47 88 ចំពោះម៉ូតូត្រូវបានសមត្ថកិច្ចអធិការដ្ថាននគរបាលក្រុងប៉ោយប៉ែត យកមករក្សាទុក និងដើម្បីស្រាវជ្រាវបន្ត ៕
