លោក ជាវ តាយ អភិបាលគណៈអភិបាលខេត្តកំពតមានប្រសាសន៍ថាការយកចិត្តទុកដាក់ចំពោះយុវជន គឺជាការកសាង.....
(ខេត្តកែប)
អភិបាលនៃគណៈអភិបាលខេត្តកំពតបានមានប្រសាសន៍ថា៖ការយកចិត្តទុកដាក់ចំពោះយុវជនគឺជាការកសាងសង្គមមួយប្រកបទៅដោយសុខសន្តិភាពមានធនធានមនុស្សនិងសេដ្ឋកិច្ចរីកចម្រើន។ លោកអភិបាលខេត្តថ្លែងបែបនេះនៅក្នុងឱកាសអញអញ្ជើញជាអធិបតីនៃពិធីអបអរសាទរទិវាអន្តរជាតិ សម្រាប់យុវជន ១២ សីហា ខួបលើកទី២០ ឆ្នាំ២០១៩ ក្រោមការរៀបចំឡើងដោយមន្ទីរអប់រំយុវជននិងកីឡាខេត្តកាលពីព្រឹកថ្ងៃទី១២ ខែសីហាឆ្នាំ២០១៩ ក្រោមប្រធានបទ"ការអប់រំដែលនាំអោយមានការផ្លាស់ប្ដូរ"ដោយមានថ្នាក់ដឹកនាំនិងយុវជនចូលរួមមកពីបណ្ដាមន្ទីរ អង្គភាពកងកម្លាំងប្រដាប់អាវុធនិងគ្រឹះស្ថានសិក្សារដ្ឋនិងឯកជន សរុបប្រមាណចំនួន៣៥០នាក់។ លោក ជាវ តាយ អភិបាលខេត្តបន្តលើកបញ្ជាក់ទៀតថា៖ជាការឆ្លុះបញ្ចាំងចាប់តាំងពីថ្ងៃរំដោះ៧មករាឆ្នាំ១៩៧៩រហូត ដល់បច្ចុប្បន្ន ពិសេសក្នុងរយៈពេលប៉ុន្មានឆ្នាំកន្លងទៅនេះកម្ពុជា មានមោទនៈភាពយ៉ាងខ្លាំងក្លា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោហ៊ុនសែនជានាយករដ្ឋមន្ត្រី បានកំណត់ដាក់ចេញនូវគោលនយោបាយជាតិ និងយុទ្ធសាស្ត្រជាច្រើន ដើម្បីបង្កើនការលើកកម្ពស់សិទ្ធិ សុខមាលភាពរបស់ពលរដ្ឋកម្ពុជាក្នុងនោះមានកុមារនិងយុវជនដែលជាប្រភពធនធាន និងជាកម្លាំងបន្តវេនរបស់ប្រទេសជាតិកាន់តែមានវិសាលភាពខ្លាំងក្លាថែមទៀត។ ដូច្នេះការយកចិត្តទុកដាក់ចំពោះយុវជនគឺនគឺជាទស្សនៈទានដ៏ថ្លៃថ្លារបស់រាជរដ្ឋាភិបាល តម្រូវជូនក្រសួងពាក់ព័ន្ធទាំងអស់ ដើម្បីដំណើរការរបស់ខ្លួន ឈានទៅសម្រេចកម្មវិធីនយោបាយរបស់រាជរដ្ឋាភិបាលកម្ពុជាដោយខិតខំប្រឹងប្រែង បន្តរៀបចំគោលនយោបាយសមស្របទៅតាមស្ថានភាពជាក់ស្ដែងរបស់ប្រទេសជាតិយើង។ លោកអភិបាលខេត្តបានបន្តទៀតថា៖ដូចយើងទាំងអស់គ្នាដឹងជ្រាបច្បាស់ហើយថាគោលបំណងនៃកម្មវិធីនយោបាយរបស់រាជរដ្ឋាភិបាលដែលបាននឹងកំពុង អនុវត្ត គឺសំដៅធ្វើឡើងដើម្បីបម្រើសំណូមពររបស់យុវជន។ ដូច្នេះហើយមានតែក្មួយៗយុវជនខ្លួនឯងដែលជាកម្លាំងបន្តវេនរបស់មាតុភូមិត្រូវតែស្គាល់ខ្លួនឯងឲ្យបានច្បាស់លាស់តើត្រូវធ្វើអ្វីខ្លះដែលមានប្រយោជន៍និងអ្វីខ្លះដែលគ្មានប្រយោជន៍ ពោលមានតែការអប់រំនិងហាត់គ្រប់គ្រងចិត្តគំនិតរបស់មនុស្ស គ្រប់រូបឲ្យស្ថិតក្នុងអារម្មណ៍តែមួយប្រកបដោយគុណធម៌និងគតិបណ្ឌិតប្រាសចាកការគុំគួន ឈ្នានីសសេចក្ដីស្អប់ខ្ពើម ការលោភលន់ ក្រេវក្រោធ កេងប្រវ័ញ្ច និងការបំបាត់អំពើហឹង្សាគ្រប់យ៉ាង នោះទើបអ្វីៗបានសុខស្រួលស្ងប់ និងរីកចម្រើន។ ជាមួយឱកាសនោះលោកអភិបាលខេត្តក៏បានក្រើនរំលឹកដល់ក្មួយៗយុវជនត្រូវតែខិតខំសម្របខ្លួនដើម្បីចូលរួមកសាងមហាគ្រួសារកម្ពុជាគ្មានគ្រឿងញៀន គ្មានជម្ងឺអេដស៍ គ្មានអំពើហឹង្សា គ្មានគ្រោះថ្នាក់ចរាចរណ៍ និងពោរពេញទៅដោយព្រហ្មវិហារធម៌។ សូមបញ្ជាក់ថា៖ទិវាអន្តរជាតិ សម្រាប់យុវជន ១២ សីហា គឺផ្ដើមចេញពីសុឆន្ទៈរបស់ថ្នាក់ដឹកនាំយុវជននៃបណ្ដាប្រទេសជាសមាជិកអង្គការសហប្រជាជាតិ គិតគូរដោះស្រាយពីកង្វល់រហូតសម្រេចបំណងធំធេង សំដៅឲ្យសង្គមសហប្រជាជាតិបង្កើនការយកចិត្តទុកដាក់ដល់យុវជនតាមប្រទេសនីមួយៗសមស្រមនិងនិន្នាការពិភពលោកសកលភាវូបនីយកម្ម ក្នុងគោលបំណង អំពាវនាវដល់រដ្ឋាភិបាល អង្គការជាតិនិងអន្តរជាតិទូទាំងពិភពលោកបង្កើនការចាប់អារម្មណ៍និងយកចិត្តទុកដាក់គិតគូដល់ការអភិវឌ្ឍយុវជន៕
