ឯកឧត្តម គឹម វណ្ណៈអភិបាលរង ខេត្តបន្ទាយមានជ័យ ផ្តាំផ្ញើដល់មន្រ្តីរដ្ឋ បាលក្រុងប៉ោយប៉ែត ថា.....!!
បន្ទាយមានជ័យ÷ឯកឧត្តម គឹម វណ្ណៈ អភិបាលរងខេត្តបន្ទាយមានជ័យ អញ្ជើញជាអធិបតីប្រកាសចូលកាន់មុខតំណែងរបស់ក្រុមប្រឹក្សា ខេត្តបន្ទាយមានជ័យអាណត្តិទី៣។ ថ្ងៃព្រហស្បតិ៍ ៣រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនិងថ្ងៃទី២០ ខែមិថុនា ឆ្នាំ២០១៩។ កម្មវិធីនេះរៀបចំឡើងនៅក្នុងរដ្ឋបាលក្រុងប៉ោយប៉ែត ។ ក្នុងអង្គពិធីនេះមានការចូលរួម ពីឯកឧត្តម លោកឧកញ៉ា មន្ត្រីរាជការគ្រប់លំដាប់ថ្នាក់ក្នុងក្រុងប៉ោយប៉ែត កងកំលាំងកងរាជអាវុធហត្ថ នគរបាល ព្រមទាំងលោកមេភូមិ អនុភូមិ និងប្រជាពលរដ្ឋមកពីបណ្តាភូមិផ្សេងៗ និងលោកអភិបាលស្រុកអារញ្ញ ប្រទេសថៃ យ៉ាងច្រើនកុះករផងដែរ។
ការប្រកាសចូលកាន់មុខតំណែងរបស់ក្រុមប្រឹក្សារបស់ក្រុងប៉ោយប៉ែត គឺត្រូវបានសង្កេតឃើញថា លោកឧកញ៉ា សាន ស៊ានហូ ជាប្រធានក្រុមប្រឹក្សា ហើយសរុបក្រុមប្រឹក្សា ព្រមទាំងសមាជិកក្រុមប្រឹក្សាមានចំនួន១៩នាក់
ឯកឧត្តម គឹម វណ្ណៈ មានប្រសាសន៍ផ្តាំផ្ញើដល់រដ្ឋបាលក្រុងនិងក្រុមប្រឹក្សាក្រុងប៉ោយប៉ែត ត្រូវយកចិត្តទុកដាក់ក្នុងបំរើសេវាសារធារណៈដល់ពលរដ្ឋ និង មិនត្រូវមានការរើសអើង រឺ ប្រកាន់និន្នាការនយោបាយឡើយ ទោះបីពលរដ្ឋមកពីគណបក្សណាក៏ដោយត្រូវតែបំរើសេវាជួនពលរដ្ឋឲ្យបានស្មើៗគ្នា។ ឯកឧត្តមបន្តថា ចាប់តាំងពីថ្ងៃប្រកាសចូលកាន់តំណែងនេះក្រុមប្រឹក្សា និង សមាជិកក្រុមប្រឹក្សាក្រុងប៉ោយប៉ែត រាប់រហូតដល់៣០ថ្ងៃត្រូវ ទៅប្រកាសទ្រព្យសម្បត្តិនៅអង្គភាពប្រឹងអំពើពុករលួយ ហើយត្រូវទៅប្រកាសឮទ្រព្យសម្បត្តិរៀងរាល់២ឆ្នាំម្តង។
ឯកឧត្តម បន្តទៀតថា ត្រូវលើកទឹកចិត្តដល់ពលរដ្ឋចូលរួមចំណែកក្នុងគោលនយោបាយ ដើម្បីភូមិឃុំមានសុវត្ថិភាព កាត់បន្ថយបទល្មើសផ្សេងៗ ជាពិសេសត្រូវចូលរួមចំណែកលុបបំបាត់បញ្ហាគ្រឿងញៀន ដោយអនុវត្តតាមបទបញ្ជារបស់សម្តេចក្រឡាហោម ស ខេង នៅក្នុងខេត្តបន្ទាយមានជ័យក្នុងឆ្នាំ២០១៩នេះ នៅតាមក្លឹប ខារ៉ាអូខេ ត្រូវតែមិនមានគ្រឿងញៀនតទៅទៀតនោះទេ ។
ជាចុងបញ្ចប់នៃកម្មវិធីក៏មានការថតរូបទុកជាអនុស្សាវរីរបស់ក្រុមប្រឹក្សាជាមួយឯកឧត្តម គឹម វណ្ណៈ ព្រមទាំងមានការ ជួនជាបាច់ផ្កា ពីសំណាក់អភិបាលខេត្តស្រុកអារញ្ញ ប្រទេសថៃ និងពីសំណាក់ភ្ញៀវកិត្តិយសជួនដល់លោក សាន ស៊ានហូ ប្រធានក្រុមប្រឹក្សាក្រុងប៉ោយប៉ែតផងដែរ៕
