លោកមេប៉ុស្តិ៍រដ្ឋបាលសង្កាត់ទឹកថ្លា បាញ់សម្លាប់ខ្លួនឯងសង្ស័យមានវិបត្តិគ្រួសារ....
(ខេត្តបន្ទាយមានជ័យ)
ប្រភពពីក្រុងសិរីសោភ័ណបានឲ្យដឹងថានាយប៉ុស្តិ៍រដ្ឋបាលសង្កាត់ទឹកថ្លា លោក ប៊ូ រិទ្ធី បានធ្វើអត្តឃាតបាញ់សម្លាប់ខ្លួនឯងនិងកាំភ្លើងខ្លីK59 ចំនួន១គ្រាប់ចំក្បាលនៅក្នុងផ្ទះរបស់លោក កាលពីម៉ោងជាង7យប់ ថ្ងៃទី 26 តុលា 2019នេះ ដោយមិនដឹងពីមូលហេតុ។ ហេតុការណ៍ខាងលើកើតឡើងនៅផ្ទះជនរងគ្រោះក្នុងភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
កាលពីព្រឹកថ្ងៃទី២៧ ខែតុលា ឆ្នាំ២០១៩ លោកឧត្តមសេនីយ៍ទោ សិទ្ធិ ឡោះ ស្នងការរងនគរបាលខេត្តបន្ទាយមានជ័យ ទទួលបន្ទុកផ្នែកព្រហ្មទណ្ឌកម្រិតធ្ងន់បានប្រាប់គេហទំព័ររស្មីជាយដែនយើងឲ្យដឹងថា ក្រោយពេលលោក ប៊ូ រិទ្ធី នាយប៉ុស្តិ៍រដ្ឋបាលសង្កាត់ទឹកថ្លា បានបាញ់សម្លាប់ខ្លួនឯង គឺលោកឧត្តមសេនីយ៍ទោ សិទ្ធិ ឡោះ បានចុះទៅពិនិត្យដល់កន្លែងកើតហេតុភ្លាមៗផងដែរ ។
លោកបន្តថា បន្ទាប់ពីធ្វើការសាកសួរសាច់ញាតិ និង កោសល្យវិច័យរួច សង្កេតឃើញថា ជនរងគ្រោះពិតជាបានធ្វើអត្តឃាតខ្លួនឯងពិតប្រាកដម៉ែន ដោយសារជនរងគ្រោះមានភាពស្រវឹងក្នុងខ្លួន ព្រមទាំងលាយឡំជាមួយវិបត្តិគ្រួសារផងនោះ ទើបឈានដល់ការធ្វើអត្តឃាតខ្លួនឯងតែម្តងទៅ ពុំម៉ែនជាករណីឃាតកម្មនោះទេ ៕