មន្ត្រីនគរបាលពន្ធធានាគារខេត្តបន្ទាយមានជ័យម្នាក់ ស្រវឹងស្រា ជោគ បើក រថយន្តបុក មនុស្សស្លាប់ នៅក្រុងប៉ោយប៉ែត
ក្រុងប៉ោយប៉ែត÷ មានករណីគ្រោះថ្នាក់ចរាចរណ៍មួយដ៏រន្ធត់រវាងរថយន្តនិងម៉ូតូបណ្តាលឲ្យបុរសម្នាក់បានស្លាប់ភ្លាមៗនៅកន្លែងកើតហេតុ។ ហេតុការនេះបង្ករការភ្ញាក់ផ្អើលទាំងយប់វេលាម៉ោង៨:៤០នាទីថ្ងៃទី២៣ ខែតុលា ឆ្នាំ២០១៩ នៅខាងលិចខារ៉ាអូខេចំការស្វាយប្រហែល៣០ម៉ែត្រ ស្ថិតនៅក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
តាមសេចក្តីរាយការណ៍ពីកន្លែងកើតហេតុបានឲ្យដឹងថា ជនរងគ្រោះដែលបានស្លាប់ បានជិះម៉ូតូម៉ាកសង់ឌ្រីម ពណ៌ខ្មៅ ស៊េរីឆ្នាំ២០១៥ ស្លាកលេខ បន្ទាយមានជ័យ1L 0630 បានជិះពីទិសខាងត្បួងទៅជើង ហើយរថយន្តបង្ករហេតុបានជិះពីទិសខាងជើងទៅខាងត្បួង (បញ្ចាស់ទិសគ្នា) ដោយល្បឿនយ៉ាងលឿន លុះដល់កន្លែងកើតហេតុក៏បានបុកគ្នាតែម្តង។
តាមប្រភពប្រាប់ថា ជនរងគ្រោះមានឈ្មោះថា ណាំ យី ភេទប្រុស រស់នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
តាមប្រភពដែលឃើញហេតុការបានឲ្យដឹងថា គេឃើញបុរសម្នាក់បើកបររថយន្តចង្កួតស្តាំម៉ាក អុីសូសូ ឌីមិច ( D MAX ) ពណ៌ ស ពាក់ស្លាកលេខ BMC 0207 បានបោះប៊ួយយ៉ាងលឿនពីទិសខាងជើងទៅត្បួង លុះមកដល់កន្លែងកើតហេតុក៏បានរ៉េចង្កួតទៅបុកម៉ូតូពេញទំហឹង បន្ទាប់មកបានព្យាយាមបើកគេចខ្លួនតែត្រូវបានកម្លាំងជំនាញនៃអធិការដ្ឋាននគរបាលក្រុងប៉ោយប៉ែត ចាប់ឃាត់បានជនបង្ករភ្លាមៗផងដែរ និងបានយកទៅឃុំខ្លួនបណ្តោះអាសន្ននៅអធិការដ្ឋានក្រុងប៉ោយប៉ែតទាំងយប់។
តាមប្រភពបានឲ្យដឹងថា បុរសដែលជាអ្នកបើករថយន្តបង្ករហេតុមានឈ្មោះថា ព្រុំ សុខ អាយុ៣៤ ឆ្នាំ ជាមន្រ្តីនគរបាលពន្ធធានាគារខេត្តបន្ទាយមានជ័យ បច្ចុប្បន្នរស់នៅ ក្នុងមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ សូមបញ្ជាក់ថា ខណ:ពេលនេះបុរសដែលជាអ្នកបើកបរកំពុងត្រូវបាន សមត្ថកិច្ចឃុំខ្លួនដើម្បីសួរនាំ។ ដោយឡែកនៅព្រឹកថ្ងៃទី២៤ ខែតុលា ឆ្នាំ២០១៩ លោកវរសេនីយ៍ទោធិការរងទទួលបន្ទុកផ្នែកចរាចរណ៌បានប្រាប់សារព័ត៌មានយើងឲ្យដឹងថា ខាងជំនាញរបស់លោក កំពុងសួរនាំនិងបញ្ជួនទៅតុលាការដើម្បីចាត់ការបន្ត៕